SHILLONG:
U symbud myntri rangbah ka jylla, u bah Prestone Tynsong u la kyntait ban ai ïa ka jubab halor ka jingkynnoh ba uwei na ki kyrtong jong ka National People’s Party (NPP), u la sam pisa sha ki paidbah, bad na ka liang ki paidbah ki la ujor sha ka election commission bad ruh na ka liang u Chief Election Officer (CEO) u la phah ïa ka Deputy Commissioner (DC) ban tohkit.
“Dei tad hadien ba la pynbna ïa ka ‘Model Code of Conduct’; ha kata ka por, ngi dei ban bud ïa ki kyndon, la ka dei ha ka jingïalang paidbah, ka rally ne kano kano,” la ong u Bah Prestone.
“Mynta ka dei tang ka jingkynnoh ba don u kyrtong jong ka seng uba sam pisa sha ki paidbah. Ïa kata ngam lah ban ong ei ei, bad ngam pat ïoh jingtip na ki bor district halor kane,” la bynrap shuh shuh u Bah Prestone.
U la bynrap da kaba ong ba u CEO u la phah ïa kane ka jingujor sha ka bor district ba kan leh ïa kaba donkam. U la ong ruh ba u kyrmen ba ka bor district kan sa pyntip sha ka sorkar haba ïadei bad kane.
