SHILLONG:
Da ki hajar ngut ki paidbah jong ka Mylliem konstitwensi, ki la ïa wan ban sakhi ïa ka jingpynïasoh pura u MLA barim ka Mylliem konstitwensi u Bah Hamletson Dohling sha ka party National People’s Party (NPP) ha ka jingïalang ka ba la long ha Madan Umlyngka.
U Bah Hamletson Dohling, u la ïakhun bad jop ïa ka election 2018, na ka party People Democratic Front (PDF) bad ieh noh ïa ka jinglong MLA ha ka 5 tarik Kyllalyngkot bad pynïasoh noh sha ka party NPP ha ka 7 tarik Kyllalyngkot.
Ha ba kren ha kane ka jingïalang u Bah Hamletson Dohling u la pan ka jingkyrshan ka ba pura na ki paidbah na ka bynta ka election 2023, da ka ba ong ba mynta ka kynti u la jied bad un mihkhmat na ka party ka ba don ki nongïalam kiba stad kiba shemphang bad kiba don ka jingkitkhlieh.
U Bah Hamletson u la ong “Ka la mih kata ka jingkynthoh ba ka NPP ka tyrwa T.5 klur kat ïa ki ba rung sha ka Party kane kakhubor ka la pynkhih ïa kiba bun balang kiba la mut ba u MLA ka Mylliem ruh u la ïoh ïa kata ka T.5 klur, hynrei ha ba ki paidbah ki la jied ïa nga kum u nongmihkhmat nga dei u rangbah uba don ïa ka jingkitkhlieh”.
“Ha ba nga la leit ban ïakynduh ïa u Myntri Rangbah, bad Symbud Myntri Rangbah shwa ba ngan rung sha ka NPP, nga la rah tang ar tylli ki mat kawei ka long ban pynthikna ba ka jingtih uranium kam dei ban urlong ha ka jylla bad kawei ka long ban pynurlong noh ïa baroh ki mat ki ba la sahteng la bun bun snem” u la bynrap.
U la kdew “Ki mat kiba kynthup ïa ka ILP, ban pynrung ïa ka ktien Khasi hapoh ka 8th Schedule bad ban pynbeit ïa u pud u sam nga kwah ba kin urlong noh haba nga don ha ka NPP, nga dei u briew u ba ju buddien ïa ki mat namar 18 snem nga la ai ka jingshakri hapoh ka KSU bad nga ju buddien ïa ki mat kiba dang sahteng”.
“Ha ki sorkar ba la dep kam pat ju don shisien ruh ba kin ïakren wat ha ka jingïalang ki kynhun myntri ruh ïa kine ki mat hynrei tad haduh ba la wan ka sorkar ba la ïalam u Conrad K Sangma la ïoh ban ïatai ïa ki ne ki mat, bad nga sngew kmen bad sngew sarong, ba kum u nongïalam ka KSU, uba ju kren ïa kine ki mat tang ha Motphran, ha Jaïaw bad kiwei kiwei ki bynta hynrei lyngba ka jingpynjop jong ki paidbah Mylliem nga la ïoh ka lad ban kren ïa kane ka mat hapoh ka jingïalang ki kynhun myntri bad ha Delhi”, u la bynrap.
“Ha social media ki mih ki jingkynthoh ba u Bah Hamletson um ju lah ban kren ïa ki mat jingeh hapoh ka ïingdorbar hynrei kane ka long namar ba hapoh ïingdorbar kum u minister, ngim lah ban kren kulmar, bad ngim dei ki biej ban shu ïa kren kulmar, nga dei u minister u ban ïakren tang ïa ka mat lajong, kiba bun ki kynthoh ba ngam kren mat jingeh ki mut ba watla nga long minister ruh ngan leit ban kren biang ha Motphran ha Jaïaw ter ter hynrei kam long kumta ha u snem 2018 nga la kular ïa u paidbah ba ngan ym kren shuh halor ki mat jingeh tang shabar hynrei ngan kren tang hapoh ka sorkar,” u la ong.
