SHILLONG:
U MLA ka Mawkynrew konstitwensi u Bah Banteidor Lyngdoh, u la ong ba um kwah ban pynphai nia ïa ki jingkynthoh na ki liang pyrshah namar u don ka jingngeit ba ki kam kiba u la leh na ka bynta ka thaiñ ha kine ki san snem ki kren kham jam ban ïa ki ktien.
U Bah Banteidor u la kren ïa kane ha ka jingïakynduh bad ki nongkitkam na ki Unit bad Circle bapher bapher ka PDF Zonal Committee Mawkynrew konstitwensi ha Thangsning.
Ha kane ka sngi la ïoh ruh ban pdiang burom ïa ki riew Rangbha na kiwei pat ki seng saiñ pyrthei kiba kynthup na ka UDP, NPP ,HSPDP bad Congress sha ka seng PDF.
Haba kren ha kane ka sngi u kyrtong ka People’s Democratic Front (PDF) ma Mawkynrew u la ong, “Ngam don eiei ban kynthoh ïa ki namar nga la trei la ka kam, bad kiba ki paidbah ka konstitwensi ki sakhi lyngba ki kam kiba nga la leh, ki paidbah kin sa shim ka rai ba kin jied biang ïa nga ha kane ka elekshon ban wan.”
U la bynrap da kaba ong, “Ma nga bad ka ïing jong nga kam shym la iehnoh ban shakri ïa ki paidbah ka Mawkynrew konstitwensi naduh ba u dang long tang u MDC naduh u snem 2014 haduh kine ki sngi.”
U la pynpaw ruh da kaba ong ba ka jingjop ïa ka elekshon MLA ha u Snem 2018 bad ka jingïoh ban bat ïa ka kam Myntri ha ka Sorkar Meghalaya Democratic Alliance (MDA ka la plie lynti ïa u ban kyntiew ïa ka thaiñ ha ki liang baroh.
“Nga la shakri da ka jingïatreilang bad phi bad ngam dei ban ong ‘ma nga’ hynrei ‘ma ngi’ hi ngi la ïaleh ban wanrah ka jingmyntoi sha ki shnong bapher bapher,” u la ong.
Haba ïadei bad ka jingwan ai jingkyrshan da ki riewrangbah na kylleng ki shnong ka konstitwensi u Bah Lyngdoh ula ong, ” Ha nga, ym don barim ne ba thymmai, ki nongkyrshan ruh ki kyrshan da ka jingieid bad ka ïing ka sem jong ngi ruh kala ai ka jingshakri kaba kylluid mynsiem ïa baroh lang.”
U la bynrap ruh da kaba ong ba kin ïatreilang ban pynlong ïa ka Mawkynrew konstitwensi ba kan kiew shuh shuh na kaba long mynta bad ban peit ruh na ka shong suk shong saiñ kan don ha ki pateng ki ban wan.
Ha kane ka jingïalang la wan ban ia don lang ruh da ki Nongïalam ka PDF Central Executive Committee, kynthup ïa u Bah Auspicious Lyngdoh, General Secretary, u Bah James Ban Basaïawmoit, Vice President, u Bah Elezar Chyne, President People’s Democratic Youth Front ha ka jingiadon lang ki riewrangbah bad nongkitkam na ka PDF Zonal Committee Mawkynrew konstitwensi bad na ki Unit bad Circle bapher bapher, ki longkmie longkpa, ki samla lem kiwei pat.
