SHILLONG:
U Working President ka People’s Democratic Front (PDF) uba dei ruh u MLA ka Mawkynrew, u Bah Banteidor Lyngdoh, ha ka 6 tarik Lber u la ong ba ka seng kam kwah ban shim shuki myntri hynrei ka shu kyrshan ïa ka sorkar namar ba ka kwah ban pynsngew ïa ki jingeh, bad ban rah ïa ki mat kiba bun na bynta u paidbah.
“Ngi kyrshan ïa ka sorkar hynrei ngi kwah ban kit ïa ki mat hapoh ïing dorbar thawaiñ. Ka jingdon jong ngi ha ka sorkar, ngi lah ban kit ïa ki mat bapher bapher hapoh ïing dorbar bad kumjuh ha jingïalang ka MDA”, la ong u Bah Banteidor.
U la ong ba lada ka jingtyrwa shuki kan wan ruh, ka PDF kam kwah ban shim ïa ka shuki.
Lah ban kdew ba ka PDF ka don 2 ngut ki MLA ka la rai ban ïadon lang ha ka sorkar MDA 2.0 ryngkat kiwei ki party kynthup ka UDP, HSPDP, BJP bad ki MLA shimet hapoh ka jingïalam ka NPP.
