SHILLONG:
U Chief Electoral Officer (CEO) ka jylla Meghalaya u Bah Federick Roy Kharkongor, u la ïathuh ba ka tnad ka la long ka ba pynkhreh na ka bynta ka sngi ban thep vote ban jied ïa u nongmihkhmat na Sohïong Konstitwensi ka ban sdang naduh ka por 7 baje mynstep ha ka 10 tarik Jymmang.
Ha ba kren bad u Kynjatshaiu Bah Kharkongor u la ïathuh ba ha Sohïong Konstitwensi kin don 34,000 ngut tam ki nongthep vote ki ban kynthup ïa ki 16,000 ngut ki shynrang bad 17,000 tam ki kynthei, 134 ngut ki briew ki ba la 80 tam ka rta bad 54 ngut ki ba duna dkhotmet.
“Ka jingpynkhreh na ka bynta ka sngi ban thep vote ka la ïaid shait shait, ha kaba ïadei bad ka election shiteng samoi ha Sohïong Konstitwensi, ki EVM machine ki la biang lut bad kin don haduh 300 ngut ki ophisar ki ba la dep training, ki ban leit sha ki 63 tylli ki jaka thep vote ha Sohïong Konstitwensi”, u la ong.
“Kum ba la dep ha ka general election ba dang shu dep, ka la don ruh ka jingthep vote na ïing ïa ki briew ki ba la kot 80 snem ka rta bad 134 ngut ki la ïoh ban thep vote bad ki ba duna dkhot met 54 ngut mynta ka kynti kumba 60% kin don ki nongthep vote lyngba ka Webcasting”, u la bynrap.
“Ban pynbit pynbiang ïa ki jingdonkam baroh ha kane ka sngi, mynta ka sngi ngi la pynlong ïa ka jingïalang ban bishar bniah ha ryngkat ki ophisar bad ki heh pulit”, u la bynrap.
U Bah Kharkongor u la ong ruh, ‘Mynta ka sngi ka jingïalap election ka la kut 4 baje bad kan ïaid ka Silence Period bad ngi kyrmen ba kan ym don kano kano ka jingpynthud bad kan long kaba ïaid beit ha ryngkat ka jingïaid pahara ki bor ba dei khmih”.
Ha ba kylli halor ka jingpynkheiñ ïa ki kyndon Model Code of Conduct (MCC) u la ong “Haduh mynta kam shem la don kano kano ka jingpynkheiñ ïa ki kyndon ha kane ka Constituency hynrei ka la don ka jingïoh kurup tang ïa ki kyiad Khasi 465 litter bad ym don kano kano ka jingpyndonkam pisa ha ka por ba dang pynlong ïa ka jingïalap election na ka bynta ka Sohïong Konstitwensi.
U Bah Kharkongor u la kyntu ruh ïa ki nongthep vote ha Sohïong Konstitwensi ba kim dei ban rah phone ha jaka thep vote, bad ki lah ban buh ïa ki Phone shwa ban rung ha jaka thep vote khnang ban ym don kano kano ka jingpynkhein ïa ki kyndon.
U la ong ruh ba kan don ruh ka jingai jingithuh ïa ki nongshong shnong ki ban wan thep vote nyngkong ha ka ba ka tnad ka la pynkhreh ban pynkup burom ïa ki.
Na ka bynta ka 13 tarik ka sngi ban niew Vote, u Bah Kharkongor u la ïathuh ba “Na baroh 63 tylli ki jaka thep vote ïa ki vote yn ñiew ha State Central Library, bad ka jingpynkhreh ka la ïaid shait shait ha ryngkat ka jingpahara ka ba jur hadien ba ki la wan buh ïa ki EVM ha ka 10 tarik jammiet”.
