SHILLONG:
Ka United Democratic Party (UDP) ha ka 17 tarik u Rymphang, 2023 ka la pyllait ïa ki mat treikam (manifesto) na ka bynta ka samoi 2023 haduh ka samoi 2028.
Haba kren sha ki lad pathai khubor u Vice President ka UDP u Bah Allantry F. Dkhar ba ha kane ka mat treikam jong ka party ki mat ba kongsan kiba ka party ka kynthup kata naduh ka koit ka khiah, ka pule ka puthi, ka rep ka riang, ban pynrung ïa ka Ktien Khasi bad Garo ha ka khyrnit kaba phra, ban pyntreikam ïa ka Inner Line Permit (ILP), ki lynti synkien lem bad kiwei kiwei. U la ong ba kumba la kdew ba ka party ïa ki mat kiba kongsan ka long ban kyntiew ïa ka koit ka khiah da kaba pynbha ïa ki jingtei kumjuh ban pynbiang ïa ki dawai ki dashin bad kiwei ha ki jaka sumar jong ka jylla baroh kawei.
U la ong ruh ba ka UDP ka thong jong ka ka long ban rat dyngkhong ïa u drok bad ban pynduna ïa ka jingïap jong ki Kmie ba kha khun bad ki Khunlung ba dang shu kha bad kiwei.
U Bah Allan u la ong ba ka party UDP ka thong jong ka ka long ban pynleit jingmut khamtam ha ka liang ka roi ka par, ka rep ka riang, ban pynkupbor ïa ki khun samla kumjuh ruh ban kyntiew ïa ka kam jngohkai pyrthei bad kiwei de. U la ong ba lada ka UDP ka wan ha ka bor kan sam ei ïa ki kot skul sha ki Khynnah kiba wan na ka longiing ba duk, ban buh ïa ki skul ba kyrpang ïa ki Khynnah ba hap khmih kyrpang bad ban pynthikna ba ki Residential School kin treikam noh kham kloi.
U Bah Allan u la ong ba kane ka mat treikam ka long ban wanrah ïa ka sorkar kaba khuid bad ba lait na ki kam bamsap. U la ong ba kim ïahap satia ïa ka jingtyrwa ïa ki mar sam ei bad kum ka party ka ngeit ba kin wanrah da ka roi ka par kaba neh shirta.
Ha kaba ïadei bad ka ILP, u Bah Allan u la ong ba ka UDP kan ïai buddien halor ka jingdawa pyntreikam ILP bad ruh la donkam ban pyntreikam ïa ki aiñ kaba la don lypa ha jylla kum ka Meghalaya Residents Safety and Security Act (MRSSA).
U Bah Allan u la ong ba lada ka UDP ka wan ha ka bor, na ka liang ka UDP kan kan sa shong bishar thymmai ïa ka Memorandum of Understanding (MoU) ba la ïasoi hapdeng ka jylla Meghalaya bad jylla Assam ban pynbeit biang ïa ki hynriew tylli ki jaka kiba don hapdeng ka jingïakajia pud.
Ha kane ka sngi ba pyllait ïa ki mat treikam ka party la donlang ryngkat u kyrtong ka Nongkrem konstitwensi u Bah Lambor Malngiang bad ka President ka women’s wing ka Kong Pretty Kharpyngrope.
