SHILLONG:
Hadien ba lah dep ban thep kyrteng ha ka 7 tarik Rymphang kum u kyrtong jong ka BJP na Mawsynram konstitwensi, u Bah Himalaya M. Shangpliang, uba dei ruh u MLA barim ka Mawsynram uba la jop ha u snem 2018 na ka tiket Congress, u la ong ba u sngew skhem ban jop biang mynta ka kynti bad ong ruh ba mynta ka sngi tang ban shu wan synran ïa u ha kaba wan thep kyrteng ki don haduh 3000 ngut ki nongkyrshan kiba wan na kylleng ka Mawsynram.
Bad ka jingkular kaba ha khmat eh u Bah Shangpliang ka long ban wanrah ruh ïa ka Civil Sub-Division hapoh Mawsynram. “Nga kwah ba ha ka sorkar kaba thymmai, ka kam kaba nyngkong duh ban leh kadei ba ngin plie ïa ka Civil Sub-Division hapoh Mawsynram”, la ong u Bah Shangpliang.
U la kren ruh shaphang ka jingdonkam kum ka jingpynbha ïa ka Mawphlang-Ballat Road, ban kham pynheh ïa ki surok bad ban ai kiwei kiwei ki kam pynroi na ka bynta ka Mawsynram khamtam eh ha kaba ïadei bad ka kam jngohkai pyrthei.
“Ka Mawsynram bad ka Sohra, ka jingitynnad ka long katjuh. Hynrei ha kine ki snem ka sorkar kaba don mynta ka la leh klet ïa ka Mawsynram bad theh pisa tang sha Sohra bad sha kiwei ki jaka”, la bynrap shuh shuh u Bah Shangpliang.
U la kdew ruh ba ki kam ba ha khmat eh ka long ka koit ka khiah, ka pule puthi bad kaba kongsan tam ka dei ka jingai kam ai jam ïa ki samla.
Haba kylli halor ki jingkam ba ki briew ka Meghalaya ki dang jwat ban pdiang ïa ka BJP, u Bah Shangpliang u la ong, “Wan sha ki nongkyndong bad phin ïoh ïa ka jubab. Ki briew ka Meghalaya ki la sngewthuh ba ki donkam ïa ka jingkylla mynta, bad ïa kata ka jingkylla lah ban wanrah tang da ka BJP”.
U Bah Shangpliang u la ong ruh ba ka jylla ka don hapdeng ka jingkyrduh pisa bad ka donkam ban khie khlieh pat bad pynpaw ruh ïa ki mat ba ha khmat ka BJP kum ka surok, ki jaka pule engineer, jaka pule doktor bad ka jingaikam ïa ki khynnah samla.
“Ki don shibun ki kam ba ngi don ban trei, bad ngi sngewskhem ba ka BJP kan don ha ka sorkar bad ban wanrah ïa shibun ki jingkylla na ka bynta ki briew hapoh ka jingïalam jong u Narendra Modi”, la ong u Bah Shangpliang.
Haba kylli halor ka jingkynnoh ba ka BJP kan pyndonkam da ka pisa ban thied ïa ki MLA hadien ka elekshon, u Bah Shangpliang u la ong, ai ba ka elekshon kan kut shwa bad peit haduh katno ngi ïoh.
Haba kylli halor ka jingshah thombor ki Khristan kiba don ha Assam, ka jylla ba synshar ka BJP, u Bah Shangpliang u la ba um nym kren ei ei halor kane, namar mynta ki dang don hapdeng ka jingpynkhreh elekshon ha ka jylla bad kumta kin pynleit jingmut shwa ha ka elekshon ha kane ka jylla.
“Ngam kwah ban kren ei ei halor kata, namar mynta ngi dang don hapdeng ka elekshon ha ka jylla bad nga tharai ba ngin pynleit jingmut shwa ha ka elekshon ha ka jylla”, la ong u Bah Shangpliang.
U Bah Shangpliang u la kyntait ruh halor ka jingkynnoh ba ka BJP ka long kaba pyrshah ïa ki rit paid, da kaba ong ba hapoh ka jingïalam u Modi, u la ai shibun ki skhim bad ong ruh ba ka don ka tnad treikam kaba kyrpang na ka bynta ki rit paid ba la thaw hapoh ka jingïalam jong u Modi.
“Ki don shibun ki kam pynroi kiba la bei pisa da kane ka minority ministry. Phi lah ban ïohi ruh ïa ka PA Sangma Stadium kaba la bei pisa da kane ka minority ministry”, la ong u Bah Shangpliang.
Haba ïadei pat bad ka jingdon kiba kam ïalade kum ki kyrtong na ka bynta ka kam MR, u Bah Shangpliang u la ong ba ki donkam ban ïakynduhlang hadien ka jingñiew vote bad kin peit haduh katno ngut ki MLA ki ïoh bad ha kane kin sa jied ïano ban long nongïalam. “Kata kan dei ka por ba ngin rai mano ban long nongïalam”, la ong u Bah Shangpliang.
Haba kren halor ka kam ka sorkar MDA u la ong ba kam dei ka por ba ngin ïa kynno iwei ïa iwei pat, hynrei ban ïalam ïa ka jylla shaphrang bad ban wanrah ïa ka roi ka par bad ba ki briew kin ïoh jingmyntoi na baroh ki skhim ba ka sorkar pdeng ka la ai.
“Ka sorkar pdeng ka la ai palat 70 tylli ki skhim sha ki briew ka jylla. Katno tylli ki skhim kiba la pyntreikam, katno tylli kiba la poi sha ki paidbah. Kumta ka dei ka kamram jong ngi kum ki dkhot kiba la shah jied lane kum ka sorkar ban peit kumno ki briew ki ïoh jingmyntoi na kine”, la ong u Bah Shangpliang.
U Bah Shangpliang u la ong ruh ba ka jingleit ïasoh jong u bad ka BJP ka dei da ka jingphah ki nongkyrshan jong u, namar ki ïohi ba dei tang ka BJP kaba lah ban wanrah jingkylla ha ka jylla.
