SHILLONG:
U nongïalam ka Trinamool Congress (TMC) u Dr. Mukul Sangma u la ong ba ka seng kan pyntreikam beit ïa ki mat elekshon kumba khlei ïa ki 10 tylli lada ka seng kan wan ha ka bor hadien ka elekshon.
Ka elekshon ban jied MLA ha Meghalaya kan long ha ka 27 tarik Rymphang 2023.
Haba kren ha ka jingïalang ha North Garo Hills, u nongïalam ka Trinamool Congress u Dr. Mukul u la kular ba ka TMC kan pyntreikam beit ïa ki 10 tylli ki mat elekshon kumba la pyllait paidbah dang shen ha kane ka taïew.
“Ka Meghalaya TMC ka sngew sarong ban pyllait paidbah ïa ki mat elekshon ha shwa ïa kiwei ki seng. Na bynta baroh, kaei kaba ngin leh hadien ka elekshon, ngi la kular 10 tylli ki mat elekshon kynthup ïa ka pule puthi, ka koit ka khiah, ki lynti syngkien, ki lad ki kabu ïa ki nongkhai nongsengkam, bad kiwei ki mat”, la ong u Dr. Mukul ha ka jingïalang.
Da ki hajar ki paidbah kila wan ban sakhi ha madan Chotcholja ha ka 27 tarik Kyllalyngkot ban sngap ïa ka jingkren u Dr. Mukul halor ka thong jong ka jylla.
Haba ther ïa ka sorkar MDA, u Dr. Mukul u la ong, “Kane ka sorkar kaba ïalam ka NPP ka dei kaba pynïaid da kito ki briew kiba don ha Delhi. Naduh ka 27 tarik Rymphang, ngin pyndonkam ïa ka bor jong ngi ban pynïatylli bad ban synshar ïa kane ka jylla rilum katkum ki aiñ da ka jingsngewthuh ïa ki jingdonkam bad ki jingeh jong ki paidbah jong man ki thliew ïing ka Meghalaya”.
Ha kawei pat ka jingïalang ha Resubelpara, u Dr. Mukul Sangma u la kyntu ïa ki paidbah ka jylla ban ïasohkti lang ban pynthikna ban wanrah ïa ka jingbha jingmiat ïa ka Meghalaya. “Ka jingmut jong ka jingjied ïa ki nongïalam ka long ban tei ïa ka jylla ha kaba ki briew ki lah ban im suk, bad lawei jong ka pateng ban wan khlem kano kano ka jingkhuslai bad ka jingeh. Kane ka dei ka jylla jong nga, ngi donkam ban mih shakhmat ban ïatylli ban pynïaid ïa ka jylla. Ngi la kylla long ki langkñia jong kane ka sorkar MDA kaba ïalam ka NPP. Ngi dei ban pyndonkam ïa ka bor jingtip ka bor sngewthuh kaba la ai u Blei ban sngewthuh bad ban jied ïano. Ngi dei ban don ka bor sngewthuh ïa kaei kaei kaban wan ne jia ha ka lawei lada ngim ïatylli mynta,” la ong u Dr. Sangma.
Ka madan ka la shongshit bha da ka jingpyrta haba u Dr Mukul Sangma u la ong, “Ngi la ïohi ïa kaei kaba la jia ha kine ki san snem ba la leit. Ka ri kaba dei jong ki Garo la ai sha Assam. Ngi la sakhi ïa ki ummat bad ki jingeh jong ki longkmie Garo kiba ïaw rta”.
U Dr. Mukul Sangma u la ther ïa ka sorkar ba ïalam ka NPP kaba la kynnoh ba ka WE Card bad ka MYE Card – kum ka baaki card. “Ngi la kular ban ai ïa ka jingkyrshan ïa ki longkmie. Don ki parti kiba buh jingkylli kumno bad naei ngin ïoh pisa ban ai ïa kane. Lada phi kwah ban tip, ïasoh bad ka TMC bad ngin pynshai ïa kiei kiei baroh”, u la ong.
