Ade !!!! Ka jingkylli ruh kaba eh bad ka jubab lei te ynnai ïa kren, la long thik kumba set kak na ka lmieng. Kane ka jingkylli kam dei eh ba nga thew ïano ïano hynrei nga sdang shuwa nalade ha kaba kane ka jingthaw u Khasi bad ka jingpynthymmai u Phareng ka la ioh teng ban teh ïa nga ha ki saikhum ban long kum ka paralok ha ki por premmiet. Kane ka baieid bathiang ka la long shisha ka jingieid ba la teh da u kynjri rngai aiu ba tang shu kem dum i suiñ bneng bad lada don ino ino i jingïakynduh kyrpang kane kaba ieid kam lah ban lait na ka kti jong nga. Bad kaba kham sngewtynnad shuh shuh ka long ba haba ngi ïa don sa bad ki lok ki jor katno ka jingsngewbang watla i met barit la kat i lymbit pynban ka sur la kat u hati sawkuna.
Hynrei kaei kaba nga kwah ban pashat hangne ka long ba nga hi shimet nga sngew ban ai kumne halor ka jubab jong katei ka jingkylli:-
Shimet: Nga shem ba ka kyiad ka long kaba iarap ban pynjahthait hynrei pat haba ym trei eiei ruh ka pynkwah hi ban pynjah jrem bad suki pa suki ka pynjah trei syndon ha kaba ka sdang ban ktah shuwa ïa ka bor met da kaba pynjah ïa ka jingkwah bam kiba tei ïa ka met ka phad hynrei lada dih kyiad pat ka rung beit krak krak bad iaid lynti la kat ka syiem ki ñierbah. Nangta pat sdang sa ka ring raikhoh nalor ba lah rai-nap lypa bad ka dur la sdang ban kylla na ka rongdoh sha ka rong snep pashor bad wat lada tah cream pynlieh sa katno katno ruh i kumba nangjngem pynban. Kaba kham kongsan shuh ka long ba ka ktah ïa ka bor pyrkhat kaba pynlong ban klet lut ïa ki kam ki jam kiba hap ban pyndep la ka long ki kam lajong ne wat jong ki briew kiba la shimti.
Ha ïing: Haba la dih hangno hi la ju shem ba kata ka ïing ka long kaba suk ba saiñ bad kaba ïa dap jingkmen, la ka long bad ki hymmen ki para, ki kmie ki kpa ne bad ki khun ki kti. Da la kham tied (kumba ju ïa ong), sdang sa ka thut kynroi kat ïa ba don namar ba la sngew la kat u hati saw kuna ban rat lut kat ïa kaba wit katba tang iaid ka miaw najan la kyllon. Ki ktien kiba ym ju kham lap ha Dienshonhi ki mih bad pyniohsngew lut sa ïa ka shnong ka thaw ban pyntip la ka jingstad jingshemphang. Ynda la khie mynstep pat sa sah ha ka lyngngoh ïa ka balei ba ki ba ha ïing ha sem jong nga ki iaid pyndem ñiuhmat hakhmat ki para marjan marpa naduh hakhmat u khyllung haduh u tymmen. Hangne u samla u hap pyrkhat bad u rangbah u hap leh ïa ki kam.
Ha shnong ha thaw: Hangne ngan buh ka jingkylli, mano kein ba ju sngap ïa ki ktien u nongbuaid watla ka long kaba shisha ne kaba dei? Shisien haba la tah poster ha la ka met lyngba ka durkhmat kaba shu i kumba dangkhie thiah baroh shisngi la shem jingeh ban ioh ïa ka jingshaniah na ka shnong ka thaw wat teng teng ban phah tih thliew jingtep ruh la tieng ioh shu kumno kumno u tih pynban ïalade. Lada kano kano ka shnong ka don bun kum kine ki shynrang samla ne rangbah, hato ngin ïa mutdur kumno kein ban iada ïa ka shnong ka thaw bad kaba kumno ka Dorbar ki Rangbah ngin ioh?
Ka Ioh ka Kot: Ha kane ka bynta nga sngew ba ka ioh ka kot kam thew eh ïa ka shimet watla ngi tip pyrshah bad pylleiñ ba shisien ba la ngop ha ine i jingieid kumno ngi kylla byndi ïa la ka met bad ka pdok. Kaba nga kwah ban batai hangne ka long ba katne u paid byllien ngi don (nga ong ïa ki para ba tied mo), hato iano kein ngi ïa pynkiew ïa ka ioh ka kot? Namar tang la rung kine ki short form (RS, DS, OC bad kiwei kiwei), ani ka jingieid jaidbynriew te ynnai ïa kren haduh ba la hap lut sa ki klat najrong miej bad satang shiphang pat ïa thew kura para ba tied. Ngin ïa buh jingkylli, katno ngut u dkhar bad katno ngut u khasi ba don Wine Store tang ha iewduh shuwa? Bad Riewspah mano bad iap kloi mano haba kumta? Katno tylli ki Restaurant be aiñ kiba don ha iew kiba dap beit da ki para ba ïa tied baroh shisngi bad ynda la kham tied ki khun dap shynrang iada jaidbynriew shah beh na restaurant kumba shah beh ksew?
Hangne ruh shaei kata ka ioh ka kot?
Ki Samla: Ka jinglehnohei kaba khia palat ïa ka Jaidbynriew ka dei ïa ki samla kaba la paw shai kdar lyngba i notice kot ba ju wah ha wine store “Not to be sold to person below 21 years” kaba mut beit ba ki khun samla jong ngi kiba dang dei ban iakhun na ka bynta ban nep bad proh ka jabieng lane ki ban pynpaw ïa la ki sap ki phong ki la ngop ha ka ïa tied bad dei kine pat bapli kiba shah pyndonkam ha ka ban ïa hylla kyrkait ban ieid ïa ka Ri bad ka Jaidbynriew. Ki sakhi kiba bun lada phai ha ki sngi shuti sha kitei ki lynti iaid pyngngad ki nongwan jngohkai pyrthei ba dap da ki samla pura kiba ia pynieng la ki kali ki bike ha ryngkat i baieid ha la ki kti bad ynda wanphai sa jia sa ki jingtynrah kali kiba shyrkhei shyrkhei bad bundien ngi ju duh ïa ki samla kiba lah ban noh synniang shibun ïa ka jaidbynriew. Hato ngim lah mo ban ia sngewbha ïa shad ïa kmen ne ïa sngewsih ïa sngewlem khlem da rung kane ka baieid sha ki ñierbah?
Ka Jingkyntu: Kitei ki jingthoh kumba la ong, ym dei ba nga kdew lane kynnoh ne beiñ ïano ïano hynrei lada ngi ïa shong pyrkhat sani bha da kaba pynshong nongrim bad raikut naduh ka shlem dohnud bad tynrai ki thied jabieng ngin shem ba ka Jaidbynriew jong ngi kam shym troin ha kano kano ka liang hynrei ka dei ka jinghiar thma ba jar jar jong kane ka umjngut kaba la pynjngut lut ïa ka pyrkhat ka pyrdaiñ naduh ki jabieng kiba dang lung haduh ki thied ki jaw kiba la iaw ka rta bad bunsien ngi ju iohsngew ïa ka kyntien kaba ngi ju ong :bym lah ieh shuh” ka jingkylli ka long “Mano kein ba khang?” “Hato u trai wine store?” “Hato ka ïing ka sem?” “Hato ka imlang sahlang?” “Hato ki kmie ki kpa?” “Hato ki khun ki kti?.
Nga nud ban ong ba lada uwei pa uwei u Rang Khasi u ieng ban iehnoh ïa kane ka jingthaw khlem pep ka jaidbynriew jong ngi kan dei kaba kiew shaphrang la ha ka met ka phad, ka pyrkhat pyrdain, ka longïing longsem bad ka longshnong longthaw, ym da donkam ban beh ia kine ki dkhar ki kling ki la her krad hi tang shu peit ïa ka met ka phad bad kumjuh ruh ym ioh hi tang ban trei iwei i kam i barit ha kane ka Ri jong ngi. Ban shu ia hylla kyrkait ba ngi ieid jaidbynriew long pynban kumba ngi ïa buaid jaidbynriew tang pyngngad la jah ka ieid. Kam dei kaba eh lada ka mynsiem ba shynrang ha ryngkat ka mon kaba jwat ka treikam ryngkat ryngkat. To ngin ïa pynriewspah la ki pla ka jaidbynriew ka la riewspah hi.
Da u Bah Kyrshanbor Rynjah
