Ka ktien ka ong, “to burom ïa la u kpa bad ia la ka kmie , ba yn pynslem ïa ki sngi jong me”. Kine ki kyntien ki long kiba kordor haduh katta katta ban phaidien sa shisien pat khamtam ha kane ka juk ba u khun bynriew u ïa beh ban ioh ïa ka jingnang jingstad, ban lum spah lum phew, ban pynlut por ha ki kam sngewbha ne khawai dawai bad ban im kata ka jingim pyrthei mynta ne modern life, ha kaba ka imlang sahlang ka lah duna bha ban ïa phylliew jingmut ne ïatei ïa kiei kiei kumba ju long ha ki por hyndai hynthai.
Ki kmie ki kpa ki dei ka nongmuna ba khraw tam ha ka ïing ka sem. Dei ma ki ba pyndap pynbiang ïa ki jingdonkam baroh ha ka jingim jong ki khun ki kti naduh dangrit haduh ynda la heh la san ha ka liang ka bam ka dih, ka thiah ka dem, ka koit ka khiah, ka pule puthi ka shong ka sah bad kiwei kiwei ki jingdonkam.
Ki long ka jingtngen, ka jingshngaiñ bad jingai mynsiem ïa ka ïing ka sem baroh kawei.Ka dei ka kamram ki khun ki kti pat ban siew kylliang ïa ki da ka jingieit bad burom ym da ka spah ne ka phew. Kane ka phang ka long kaba donkam haduh katta katta ha kine ki sngi namar don ki khun kiba shim pynban ba ki kmie ki kpa ki long ka jingkit ba khia ïa ki ha ki sngi ka jinglong tymmen jong ki ha jaka ban ai jingtngen ïa ki bad ki bym sngewthuh ïa ka dor ki kmie ki kpa da kaba ïabeh ïa kiei kiei ki jingsngewbha kane ka pyrthei bad don ki kmie ki kpa kiba don la ki khun ki kti ki poi sah pynban ha ki jaka ri ïa ki riew tymmen ne ha ki old age shelter.
Kaei ka daw jong kane baroh. Ka jubab hi ka long ba ka jingieit ka la hiar dor bad kiwei kiwei ki daw kiba pynlong ïa ki ban poi sha kum kita ki jaka namar ba ym don ba peit ba jngoh ïa ki ha ki sngi ka jingnoh ka met ne jinglong tymmen.
Haba ngi phai sha ka imlang sahlang jong ngi kum ka jaidbynriew ka long kaba kongsan ba ngi dei ban kiar lailum laiwah ban lehbeiñ lehkhoh ïa la ki kmie ki kpa ne ki meinah meisan, ki kñi, ki hynmen ki para kynthei ne shynrang bad kiwei kiwei hynrei ban ñiewtang ïa ki shi rta khamtam ha ki sngi ka jinglong tymmen jong ki da kaba ai ïa ki, kaba bha tam ha ka jingieit , ka jingburom bad jingsngew shngaiñ kumba la saiñdur da ki longshwa manshuwa jong ngi ban tehsong ïa ka jinglong kawei ha ka longïing longsem, longkur longjait bad ka mynsiem jingkitkhlieh ïa kitei baroh kiba la kdew haneng , khnang ba kin nym poi satia sha kum kita ki jaka ri ïa ki riew tymmen hynrei ban ioh ïa ka jingieit bad sngew shngaiñ ha la ki jong ki ïing ki sem.
S Kharbteng
