Haba ngi peit ïa ka Ri Khasi Jaiñtia ba ieit jong ngi baroh ngi tieng ngi syier bad pangnud ïa ka jingshah leh beiñ bad shah thombor na baroh ki liang na ïing bad na bar, da ka jingleh bym hok bym khuid shuh ha ka synshar khadar ha kita kiba ngi shaniah ngi la jied la thung bad pynkup bor da ka burom kaba janai bad kyrpang ha ka ri ka jylla ha ki dong ki shnong ki kyntoit ba kin long shisha kita ki rishot bad kynroh ba skhem ban ïada ïa u pud u sam ïa ka ri ka jaidbynriew na ki nong wan thombor bad ki nongwan lehbor. Hynrei ym i dak jingkyrmen bad jingïada haduh kine ki sngi.
Khamtam ha kaba ïa dei bad u pud u sam bad ka jingwan bad syrtap ki bar jylla bad nongwei na ki ri ba marjan bad ka India khlem sangeh ha ri jongngi bad ka jingïoh rung kyrteng jong ki ha ki dong ki shnong ka ri jongngi da kaba suk lyngba ki dorbar shnong bad ki nongmihkhmat paitbah na ka por sha ka por khamtam shwa ka election kam long kaba dang mynta ne kaba dang thymmai, hynrei kaba la jngai bha haduh ba kin da bun paid katne katne bad ioh shibun ki jingmyntoi kum ki nongshong shnong ba dei hok ba shisha ka jylla ka ri jongngi.
Wat kito kiba dang wan dang katto kane por ruh da ka jingïarap ki briew jongngi hi kiba pdiang ïa ka jingkylla ki por ka bym hok kiba la pynhair dor ïa ka bor ki iktiar ba burom ka synshar khadar kaba don ha ki dorbar shnong, ha ki District Council bad ha ka ïing dorbar ka jylla bad kiba la kylla long ruh ki nongshun barieh bad nongpyniap ba jar jar ïa la ka ri ka jaidbynriew da ki rukom bym mih shylluit bad kiba shyrkhei na ka bynta ban skhem ka bor bad ïoh myntoi shibun. Kiwei ki jaidbynriew haba ki ïarap ki ai jingmyntoi bad ai jingkyrshan ïa ki briew jongngi ym ba ki tieng ne ban jngai ka jingsyier na ngi, em ym dei kumta. Hynrei ban long trai halor jongngi namar ki long kiba sian kiba stad bad buit tuh bad jngai bha ka jingiohi ym tang shi pda maw. Bad kim ju klet bieit ki kynmaw dngong kaei kaba la leit kaba la duh nong bad kumno mynta ban ïoh nongpeit kumno phi ïohi mynta ïa ka jingbun paid jong ki ha sor ne nongkyndong kim tieng ki salia bad ym i pyrwa shuh wat ïa ki seng bhalang kiba la ïaleh shitom ban khanglad ïa ki na ka por sha ka por hynrei i pynban kumba ai sboh ïa u jingthung ba un mih bha bad manbha. (BALEI KUMNE MO?)
Lada kum kine ki rukom synshar bym hok bad ba shukor jaidbynriew ki dang ïoh lad bad ïaibteng te kan poi ka por ba hap ban ïa-umsnam shuwa para ma ngi namar kita ki bym hok bad bymman ki la teh la khum ïa ka jaitbynriew ha ka por jong ki bad pynlong syndon ïa ka jingieit jingïatylli ha ka ri ba kan shong kynrong bad shong lynnong ha ki dong ki shnong ki kyntoit bad ka kabu ksiar ïa ki bym dei trai ri trai muluk. Balei keiñ katba ki dang pyrshang ban poi sha ka thong ba ki thrang ki thmu (paradoh parasnam) i ma shisha ban peit ïa ka jingbuaid ri buaid jaitbynriew jong ki bad kim ju lah shah ïa ka jingshah lehbeiñ shah leh tohmet ki paradoh parasnam ha ki bar jylla bar ri bad ki pyrta ki kyrsiew ki pynkyndit ban lait na ka shah synshar bar jylla bar ri.
Hynrei ynda ki la ïoh bad kheit ïa u soh ka jingthrang ka jingthmu kiei kiei baroh ki kylla khongpong noh bad i pynban kum ki nongpynshlur bar jylla bar ri ban wan sha ri jongngi. Mynshuwa lada shah shoh shah thap shah lehbeiñ ki trai ri trai muluk la shongsyier ka ri la tieng la syier kiwei ki ri jaitbynriew, hynrei mynta shah shoh shah thap shah pynmynsaw bad shah shim jingim ruh shu kut tang ha ka byrngem bad shong syier kylla ki trai ri trai muluk. Peit mynta ka jingwan jong ki khlem sangeh bad khlem salia lada ïoh lad ban rung sha ri jongngi lada don jingkulmar ne ym don jingkulmar ha ka ri ka jylla ka jong ki, ki shlur bad kim tieng, Balei kumne? Namar ki ioh jingïarap jingshngaiñ na ki briew jongngi. Kum ki paid ka ri bad ki Seng Bhalang bapher bapher pynkhlaiñ bad peitngor bha ïa ki buaid ri bad buaid jaitbynriew bad ki khwan myntoi bad ki mynder ri kiba wan rung ha ki dong ki shnong, ka ri jongngi, namar ka jingnep u Khulom bad ka jingstad ka jabieng ruh ki shem shitom ban ïada ïa la ka ri ka jaitbynriew lada la pang la swai bad ringsdot ka jaitbynriew ha ka rit paid.
Ka jingtrei shitom ki Seng Bhalang wat haduh kine ki sngi. Kum ki trai ri trai muluk barabor ngi dei ban peitngor bad husiar bha bad ban nym ai wai ïing ai wai dukan ha iew ha hat ne ha shnong ha thaw. Namar kine ki jaitbynriew kin sa pynsngewsih bad pynmynsaw kylla ïa ngi, peit ka iew mynta ka la kylla dong kylla shnong bad dap da ki khyllah jait ba shong ïing (Balei Kumne?) ka la dei hi ban ong ka iewduh u Khasi bad ka iew iohnong bad ka iew leh katba mon u bar jylla bar ri. Namar u la dep pyndep ïa kaba donkam na ka bynta kiba ailad bad un sa bom jem ïa ki briew jongngi, lada don ka jingklumar bad u la dep leh teng ruh namar ngi la klet ïalade ïa la ki khun ki ksiew tang na ka bynta ka ïoh myntoi shibun.
Mano bym kwah spah kwah klur, kam dei pat ban long ka nongkjit snam ka nongpynmynsaw bad nongpyniap kylla ïa la ki khun ki ksiew bad ki pateng ha ka ri bad ka jaitbynriew, ki dak ki shin te ki nang ïai paw sha ka jingbym shngaiñ shuh bad ka bym slem hi ruh kaba ngi hap beit ban ïa kynduh jingeh kiba laiphew jait kiba tang ki sngi hi ki ban pynpait dohnud bad pynlyniar ha ka jingsynshar ka kwah rhah, namar nalor ba ngi tip ngi iohi bad sngewthuh, hynrei ngi ïaleh pyrshah ïa ka jingshisha. Lada ka jinghiar thma kan long na ka mariang te ym don jingkylla tang ki khmat sha bneng, hynrei lada ka long na kita kiba ngi la tip bad sngewthuh ba ngin sa shah lehbeiñ shah leh tohmet bad shah patar sharum shaneng kumba patar u khla u sing ïa ki mrad ba tlot bor shano ngin phai?
Sha ki buaid ri buaid jaitbynriew ne sha kiba pyrshah bar jylla bar ri tang na rymmiang shyntur katba ka mynsiem pat khot wer ai jingshngaiñ jingsyaid da ki rukom ba kyllaiñ bad ba bun jait (nongdie ri nongdie jaitbynriew) mynta nangne shakhmat ngi dei beit ban ïa tylli kawei ryngkat ki Seng bhalang ban pyni shisha ïa ka jingieid ïa la ka ri bad ka jaitbynriew la ka long ha kano kano ka rukom, ngim dei shuh ban shah pynthame ha ki buaid ri buaid jaitbynriew bad ki khwan myntoi. Namar mynta ngim don shuh ha shiteng riat ne sha Tripura ka jingmut jingpyrkhat, mynta ngi la don ha ka lyuh ba triem bad ha madan thma ba la shah ker sawdong da ka jingleh bym hok ki nongshun ba rieh bad nongpyniap ba jar jar (kiba dei ki paradoh parasnam la jong).
Da i D.Dkhar
