Bunsien ngi ju iohsngew ïa ka jingïalap ïa riew jong kiba bun ha ïingkhawai ki jingïaseng ne iing iap briew shaphang ka jinghiar dor jong ka akor longbriew manbriew u khun khasi khara. La i duh jingkyrmen bad la i shitom ban maramot ïa ka jot ka pei jong ka jaitbynriew. La ngi phai sha ka akor ka burom ka ktien ka thylliej ka riam ka beit ka bam ka dih ka iaid ka ieng ka trei ka ktah bad ha kiwei kiwei ki bynta. Ngi iohi ba ka la nang sting thew bad nanghiardor katba nang mih ki sngi.
La ka long ka sor ne nongkyndong ruh ngi iohi ba ka jingsniew ka la nang biah phongrai ha ka jaitbynriew jongngi. La ngi phai sha ka synshar khadar ka niam ka rukom ne sha ka tiphok tipsot. U khun khasi ngin shem ba ka la nang synjor synjor bad sdang syntuid sha ka ahor pungktieh jong ka pap ka sang. La jur sa tang ka thok ka shukor ka buaid ka tanglang, ka lalot spah bad ka khwan myntoi. Wat ka mynsiem ïa tip lem ruh i kumba kam don shuh ka jingnud ban leh pylleiñ pylleiñ ïa ka jingsniew bad jingsarong hangamei ka la sdang ban synshar lane ban shong kulai ha kiba bun ki briew kane ka juk kaba ngi im mynta. Kat shaba ngi phai ngi dap tang da ka jingdiaw mynsiem suda.
Sa kawei pat kaba paw shuh shuh mynta ka long ka jingbuhrieh ïa ka jingshisha ne jingarsap napoh napoh ki briew ki ïa trei lang bad ka jingsniew katba shabar pat ki pynpaw la kumba kin rat dyngkhong ne pynduh jait syndon ïa ka jingtap eit miaw bad ka jingtieng ban kren ne leh ïa kaba shisha ka ïarap ban pynkharoi shuh shuh ïa ka jingsniew kane ka dei ka juk ban khynniat ha kiwei pat katba ïalade ki ïaleh ban kiar ngi khmih lynti ba ieh kin leh kiwei kiba nud, katba ïalade pat ki kylla long tang ki nongpeitkai.
Ha kum kane ka por ka ri ka donkam ïa ki khun dap shynrang kiba nud ban ieng pyrshah ïa kiei kiei ki bym shisha bad kiba long ka daw jong ka jingtroiñ ïa ka jaitbynriew ka la dei namarkata ba ngi dei ban pyrkhat thymmai noh kumno ban wanrah biang ïa ka jingkyrmen bad ïa ka jingbhabriew jong ka ri kaba la shah biah phongrai ha kiba har rukom ki jingsniew da kaba ngi ieng rangbah ka por ka la dei ba ngin sdang leh eiei noh, ym ban kut tang ha ka ïa beiñ ïa khoh ne ïa kynnoh iwei iwei pat.
Kaba kongsan tam ba ngin wanrah ïa ka jingkylla ka long da kaba ngin sdang shuwa ïalade kam pher la ka long ka kam kaba rit ne kaba khraw. Ngim lah ban shu ap khmih lynti ba kiwei kin leh eiei pynban shimet shimet ngi dei ban ïa shim bynta lang ban wanrah ïa ka jingkylla ym ban shu shong kli kti ne ban hun katba ka long ne jia. U Agerilaus u ong “kaei kaba pynkhlaiñ ïa ka nongbah kam dei da ki dieng sawdong ki maw ne ki kynroh hynrei da ka jingim ki nongshong shnong jong ka.”Na kitei ki kyntien ki riewkhraw haneng ngi sngewthuh ba man la uwei pa uwei napdeng jongngi (u khun khasi) u dei ban don ka jingkitkhlieh ïa la ka jong ka ri bad ka jaitbynriew.
Namarkata to ngin ïa sangeh noh ïa ka jingïakdew kti bad ka jingïakynnoh para ma ngi bad pynduh noh ïa ka jingpynksan tang ïalade. Lada ngi donkam ban wanrah ïa ka bha ka miat ha ka imlang sahlang, to ngan long shuwa ma nga ka jingkylla ryngkat bad ka nuksa ba bha. Naba kumba nga ong ka kyntien ki riewstad, “ka kam ka kren kham jam ban ïa ka ktien” khlem jingriej ne jingtieng to ngin iaid shaphrang ha kane ka thong bad ka jingangnud khnang ba ka jaitbynriew jongngi kan ieng rasong.
Khublei
Da i Rympei Lyngdoh Nongrum
