Ha ka juk kaba mynta ba ngin sngewthuh lane ba ngin ithuh kaei kata ka jingieit ba shisha? Ia u bynriew la long kaba eh than haduh katta katta.Nga da kynmaw bha ha ka por ba nga dang rit lada phah jingphah kino kino kiba la san lada ngam kohnguh ngan shah shoh beit ha ki bad ynda nga leit ïathuh ha ïing ruh kin ong pynban ba me la leh aiu? Ynda nga ïathuh biang ha ïing ruh kin shoh biang kin ong tad ba balei me la saitlah? Hynrei pat ha ka juk kaba mynta haw to leit shoh ïa ki khun ki briew ki kmie ki kpa mardor hi kin wan ban kynroi kylla ia phi kin ong ruh ba me lah khaw ih khaw im ma me ba me shoh ïa ka/u khun jongnga.
Hangne ngi ioh bad tip thikna ba ïa ka jingieid ba shisha ki briew kim pyndonkam hok shuh shisien nga la poi leit thiah ha Civil Hospital.Ynda nga la thiah kumba shitaiew eiei nga la ioh bor ban khie khlieh.La don pat kawei ka miet ha kaba ngam lah ban iohthiah bad nga shu iaid kai noh ban jngoh ïa ka Hospital hynrei ngam tip kumno re ba nga poi kynsan ha ka jaka ba pynthiah ïa ki briew ba mynsaw ynda nga la iaid nga la iohi ïa uwei u khynnah samla ba thiah mynsaw hangta bad ha syndah jong u u don u paralok jong u, uba dang pynduwai na ka bynta u lok lajong.
Te kata ka rukom duwai jong u ka la shoh ïa nga bad nga ap tad haduh ban kut ka jingduwai ynda kumta nga la kren ïa ki bad kylli ruh la nga lah ne em ban shongkai lang hangta te ki la la ong long.Te nga la shong bad nga la kylli de ba balei ïa jia ïa u kum kane te uta u paralok u la jubab ba haba ki dang ïa leit jingleit lang baroh shi paralok la wan kynsan kawei ka trok bad syllad artad ïa ka motor cycle jongngi bad baroh ngi khlem lei lei hynrei sniew bok pat une u lok ba u la mynsaw tangba kita ki paralok pat kim shym wan satia ban jngoh ïa une te nga pat nga ong ha uta u paralok jong uta uba pang ba u lok ha ka shipa dei u lok uba shisha nangta une u paralok u dang bteng shuh shuh da kaba ong ba phi tip bah ha shuwa ban une u lok jongnga un phah thied Motor Cycle ha I Mei I Pa nga nga la khang arti arjat ïa u ba um dei ban phah thied bike hynrei katta ruh um shym la kohnguh bad u la Demand beit na I Mei I Pa da ka Bike Pulsar namarba ki kmie ki kpa jong uta uba ap pang ki dei kiba kham bun spah shuh shuh ban ïa uta u khynnah ba thiah pang.
Hynrei ki pat ba u ioh ïa ki kmie ki kpa ba riewblei bad ba nang ruh ban sneng ban pyni ïa la u jong u khun ba un ym iaid ha ka lynti kaba bakla bad lehse haba u la kwah ruh ban ioh bike hynrei da ka jingnang palat jong ka kmie u kpa u la kohnguh ïa ki hukum jong ki.Ka jingai nuksa jongnga ka long ba ma ngi ki kmie ki kpa ngi dei ban bishar bha ha shuwa ban ai eiei ïa la ki jong ki khun.
To ngin ïa phai pat sha ka ktien ba im jong u Blei.Kumne u ong u Trai wat ai ba u riewstad un sarong ha la ka jingstad lymne uba khraw bor un ym sarong ha la ka bor u riewspah to un ym sarong ha ki spah jong u.Hynrei uta uba sarong to un sngew sarong ha kane namar ba u shemphang bad ba u ithuh ïa nga ba nga long u Trai uba leh ïa ki jingleh ieid ia ka jingbishar bad ia ka hok ha ka khyndew.Naba ha kine kiei kiei nga sngewbha keiñ ong u Trai Jeremaiah 9:23-24.
Hangne ka plan ka jong u Trai ka long ba u la pyn laitluid ba lada ngi ithuh ïa u ngi dei ban sngewsarong Balei u pynlaitluid kumne namar ba shisien ba u briew uba la ithuh ïa u Blei um ju bakla shuh ha kino kino ki bynta. Sngap ki jingkular ba thiang ki jong u Blei Trai Kynrad kiba un pynurlong lada ngi shaniah ha u.
Suk uta u briew ba shaniah ha u Trai bad uba ka jingshaniah jong u, u long u Trai bad uba ka jingshaniah jong u, u long u Trai.Naba un long kum u dieng ba la thung hajan ki um bad uba pur ïa la ki jong ki thied hajan ki wah bad ba un ym sheptieng haba wan ka jingshit hynrei ka sla jong u kan long jyrngam bad ha ka snem ba rang ryngkhiang yn ym sumar khuslai lymne yn ym pep ban sei soh Jeremaiah 17:7 hynrei haba peit pat ha ki juk ba mynta ban wad lane ban shem kiba shaniah shisha ha u Trai la duna haduh katta katta to sngap ka ktien u Blei ka ong pat sa da kumne.
U nong Ethopia u lah ban pynkylla ïa la ka snep lane u Labasa ïa kaba thoh dak? Lada kumta phi ruh phi lah ban leh bha haba phi la mlien ha kaba leh sniew (Jeremaiah 13:23) Hangne ha ka ktien u Blei ka kren ka mut ïa kito ki briew ïa kiba ka pyrthei ka la ioh ban thaiñ bad ban syngit haduh ba ki long kum kito ki si samkhmut kat shaba kynoi ki pyrthei ki leit.
U Blei u Trai Kynrad u ju kwah bha ba ki briew kin tip ba dei tang ma u uba lah ban pynbha ban pynjot bad tang ïa u hi ki briew baroh ki tieng buorm dei namar kane ka daw ba u Blei u sa kren kumne ha u Jeremaiah.Ka ktien kaba la wan na u Jeremaiah ha u Trai ka da ong to khie bad leit hiar sha u nongthaw khiew bad hangta ngan pynsngew ha me ïa ki ktien jongnga Hangta nga la leit hiar sha ka ïing u nongthaw khiew.Te ha khmih u trei la ka kam halor ki shalyntem te haba uta u khiew ba la thaw da ka dew byrtha u la sniew ha ka kti u nongthaw khiew u la thaw pat ïa u ban long uwei pat u khiew katba u ibit u nongthaw khiew ban thaw ia u (Jeremaiah 18:14).
Peit thuh ka jingjia kaba jia ha ri Japan.Ka ri Japan ka dei ka ri kaba la kiew sted haduh katta katta ha ka dewbah Asia baroh kawei. Ki briew ha kato ka jaka kim ju pynsep ei tang shi minit ruh ïa ka por.Nga iohi ruh ba ka jingshna iing jong ki ruh ka la long kaba skhem bha ba wat lada wan u jumai ruh ym i khih shuh bad ha kane ka jingiabeh thong jong ki ban tur sha ka pyrthei ban paw shakhmat kim don shuh ka por pat ban wad ïa u Blei.Peit pat haba u Blei u Trai Kynrad ka bor ïa ka mariang ban pynjot haduh ba ki met iap jong ki la long kum ka maw ka dieng.
Ngi dang donbok palat ma ngi ka jylla Meghalaya ba u Blei u khlem shah ban jia kumba jia ïa ka Japan.Namar ba dang don ki briew kiba dang wad Blei to ngin ïa peit biang na ka Baibl.Ah Jerusalem Jerusalem pha kaba pyniap noh ïa ki nongïathuhlypa bad kaba lynthem maw ïa kita kiba la phah ha pha.Katno sien ba nga la kwah ban kdup ïa ki khun jong pha kumba ka syiar ka kdup ïa ki khun jong ka hapoh ki thapniang jong ka.Phi te phim mon ha khmih ïa ka ïing jong phi lah iehnoh ha phi ka ïing jah.Naba nga ong ha phi phin ym iohi shuh ïa nga naduh mynta tad ynda phin ong Long ba la kyrkhu ïa uta uba wan ha ka kyrteng u Trai Math 23:37, 39.
Namar kata ngi dei ban long kiba sngur bad shaniah tylli mlon ha u Trai Jisu khnang ba ngin lah pynïapher ïa kaba sniew bad kaba bha.Hynrei katba ka pyrthei ka nang tyllun sha khmat kiei kiei kiba bha la imat ba kin sa duh jait noh namar ki briew kim leh tang ki kam ba sniew hynrei ki ktien ba ki kren ruh ym don shuh ka jingshhisha la shu kren beit katkum ba kwah u thylliej.Dei na kane ka daw ba u Trai Jisu u la batai kumne lane phin tharai ba bha ïa u dieng bad ïa u soh jong u ruh lane phin tharai ba sniew ïa u dieng bad ïa u soh jong u ruh naba ïa u dieng yn ithuh na u soh jong u. Ah phi ki khun ki ksiew ki bseiñ phi ki bymman kumno phi lah ban kren kaba bha?
Naba na ka jingshlei ka dohnud ba ka kren ka shyntur u briew uba bha u sei noh kiei kiei kiba bha na ka jingkynshew kaba bha ka dohnud jong u. U briew uba bymman ruh u sei noh ïa kiei kiei ba bymman na ki jingkynshew ba bymman jong u. Hynrei nga ong ha phi ba ïa ka ktien thala baroh ïa kaba ki briew kin kren kin ïa ai jingkhein shaphang kata ha ka sngi bishar naba na ki ktien jong me yn pynksan ïa me bad na ki ktien jong me yn pynrem ïa me.
Bah Elas Khongsti
