Ka kyiad ka dei kawei na ki jingdih pynbuaid kaba la pyndonkam da ki briew naduh ki por ba kham mynshuwa. Ki don katto katne ki jaitbynriew ha ka pyrthei kiba pyndonkam ïa ka kyiad ha ka por lehniam leh rukom. Ka kyiad ka dei kata ka jingdih ba lada ngi dih bun ïa ka, ka pynbuaid bad ktah ïa ka koit ka khiah hapoh ka met jongngi. Mynta hangne ngin ïa kren katto katne shaphang ba kumno ki briew ki sdang ban dih ïa ka bad kaei kaba jia hadien habud.
Teng teng nga ju iohsngew ba don ki briew kiba ong hana lada dih teng teng ne ‘dih khyndiat’ka kyiad ka ïarap ïa ka koit ka khiah. Ngam tip la ka long shisha kumta ne kumno hynrei bunsien ba nga ju iohi pat ba kito ki briew kiba ong ‘dih teng teng’ ne dih khyndiat’ ki kylla poi sha ka jingdih ba man la ka sngi ne kylla khra pei. Don ruh ki briew kiba dih ïa ka kiad la ka por ba ki sngewsih ne bun jingmut jingpyrkhat ne ba don kino kino ki daw ïing daw sem bad don ruh kiba dih ïa ka ha ka por leh sngewbha wat kum ha ki sngi lehniam ruh kum ka khristmas.Kine baroh ki dei ki jingsngewthuh bakla kynmaw ba ka kyiad kam lah ban wanrah jingsngewbha ne jingsuk ne ban pynïasuk ha ïing ha sem haba don ki jingbym ïa sngewthuh jingmut bad ruh kam lah ban nang pynsngewbha ne sngewkmen shuh shuh ha ka por leh sngewbha hynrei ha kaba kut ka ïalam sha liewlep.
Bun na ngi ki briew haba ngi la ioh mad ïa ka kyiad ngim lah shuh ban ieh ïa ka. Man la ka sngi la shu lap miet tang ha winestore ne pata kyiad haduh ban da klet noh sa ïa ka kamai kajih ïa kiba ha ïing ba ha sem bad duh noh ruh ïa ka jingïatip lem parabriew ha ka imlang ka sahlang.Haba ki briew ki la dih kyiad kim lah shuh ban tehlakam ïa la ka jingmut jingpyrkhat bad ruh ki sngew ba ym don shuh kat ma ki, kiba khlaiñ ne ba stad bad ruh kim nang shuh ban da ïa la ka akor ka burom. Dei hangne ba sa mih lut ki jingsniew ba laiphew jait laiphew rukom. Mih ki jingïashoh ïa dat ha ïing ha sem u khun u shoh ïa la ki kmie ki kpa ne hynmen para ne kino kino kiba ha ïing ha sem u tnga u shoh ïa la ka tnga ne ki khun ki kti ha shnong ha thaw ne ha imlang sahlang uwei u shoh ïa uwei pat na i daw iba rit ne khlem kino kino ki daw bad na kine kiei kiei baroh mih sa ka jingiam briew ha shnong ha thaw ne ha ïing ha sem ka jingkulmar ne jingïakynad ha shnong ha thaw bad kumta ter ter.
Ym tang katta hynrei ruh bunsien ba ki briew kiba la dih man la ka sngi haba kim don pisa shuh ban thied kyiad ki sdang sa ban dawa na la ki kmie ki kpa kiba ha ïing ha sem ne ha ka lok ka tnga. Haba kim ioh ki sdang sa ban byrngem byrsit ban tim tla da ki kyntien ba laiphew jait laiphew rukom bad ki nud ruh ban leit ruh leit lute na kiwei tang ban ioh bai kyiad. Haba la buaid la nud lut ban leh ïa ki kam sniew kam smeh ki kam pohjait pohrati khlem da don shuh kata ka jingsngewlem para briew.
Dei hangne ba ka jingbha ka burom ka akor ka suk ka saiñ bad ka kmen ka sngewbha ki duh jait noh ne nang ringswai. Haba la synshar ka kyiad ïa u briew ym don shuh ka jingïa burom iwei ïa iwei hynrei tang ka jingsngewkhraw sngew ha nga mei bad ka la pynlyngkien ïa ka pyrthei tang da ki jingkulmar bad ki jingiambriew.Ka kyiad ym tang ba ka ktah ïa ka imlang ka sahlang hynrei ka ktah ruh ïa ka koit ka khiah jong ki briew kiba dih ïa ka. Bunsien ki briew kiba la dih kyrni ïa ka kyiad kim ju kham im slem.Kumta ka kyiad ka dei kawei kawei na ki nongshun bad nongpynjot bakhraw jong u briew. Balei mo ba ka sorkar kam lah ban khang ne pynduh jait noh shisyndon ïa ka kyiad? Bad ruh balei ba kane ka sorkar kmie ba mynta ka thmu ban khang bam doh ïa ki nongshong shnong kiba hap hapoh ka jingsynshar jong ka hynrei ym ïa ka kyiad? Ka doh ka dei ka jingbam ba tei ïa ka met jong u briew hynrei ka kyiad pat ka pynjot pynpra ym tang ïa ka met hynrei ïa ka mynsiem ruh. Balei ruh mo ba ki sengbhalang ki da ïaleh haduh katta ban beh ïa ki mynder hynrei balei pat kim lah ban ïa beh shuwa nyngkong ban beh ne pynduh jait ïa ka kyiad?
Hooid ngi dei ban beh ïa ki mynder khnang ban ïada ïa la ka jong ka jaitbynriew hynrei kaba nyngkong pat ngi dei ban rat dyngkhong shuwa ïa ka jingsniew (kyiad) kaba bam bad pynjot pynpra napoh napoh ïa ka jaitbynriew kumba ong ka ktien kiei kiei baroh ki sdang shuwa na la rympei. Kumta ngin pynduh jait bad rat dyngkhong shuwa ïa ka jingsniew ha la ka ri bad ngin sa beh pat ïa kita ki mynder kiba la wan ban leh trai khlieh ha ka ri jongngi. Khatduh khatwai shuwa ba ngan pynkut noh nga kyrpad ïa phi kiba pule ïa kane ka jingthoh jongnga ba phin kiar raimaw raidieng na ka kyiad bad ruh ba phin ïa sneng ïa kyntu lem ïa la ki khun ki kti, ki hynmen para ba ha ïing ha sem ki lok ki jor bad ïa baroh ki para briew ba kin kiar raimaw raidieng bad ban ïaleh pyrshah katlah kat iai ban pynduh jaid ïa ka kyiad kaba long ka nongshun bad ka nongpynjot ba khraw jongngi.
Da u Bah Carmel Fedrick Malngiang
