Ki riewtymmen jongngi ki ong ba ka “lawei jong ka Ri bad ka jaitbynriew ka shong eh ha ki samla” hooid kane ka jingong ka long kaba dei shisha bad shisien pyrkhat ïa kitei ki kyntien ka ktik bad kyrsiew thiah ïa ki khun samla jongngi khamtam jong ka Bri u Hynñiewtrep Hynñiewskum bad ka long ruh kaba shonghok bad shongnia.Hynrei ka jingkylli ka wan ba hato kane ka lah ban long mo lada kita ki ban long ka lawei jong ka Ri bad ka jaitbynriew kim shim la shah hikai ne shah ïalam ha kiba la kham ha shuwa ka long kaba eh haduh katta katta ban pyrkhat.
Hato ka long kaba sngewdei mo ba ngin shu pynkit ba ka lawei ka shong ha ki samla balei nga ong kumne? namar ngi iohi ba bun ki samla kim sngewthuh ïa ka lawei ka mut aiu kata ka lawei haba ngi peit ha kane ka juk kaba mynta ka jingim jong ki khun samla ka shong syier bad ka synjor ruh haduh katta katta bad ngim tip ruh kan long kumno kata ka lawei kaba phyrnai jong ki namar ngim lah ban len shisha ba ki khun samla jongngi don bun bah kiba jot bad ngat ha ki jingmlien kiba sniew ba laiphew jait kiba kah dum ïa ka lawei ba phyrnai jong ki.
Ngi sngewsih ban ong ba balei ka long kumne? La sngewthait ban kynnoh shi kynnoh ïa ki kmie ki kpa namar lada ngi pyrkhat bad pynshong nongrim bha ngi sngewthuh shai ba ki kmie ki kpa ki dei ki Blei ba ar ha kane ka pyrthei bad dei lyngba ki kmie ki kpa kiba long ka saiñdur ïa ka lawei jong ka ri bad ka jaitbynriew kitei ki dieng pyngkiang baroh ki mih lehse dei na ka daw ba kham bun hi ki kmie ki kpa ki shongkha kloi ne dangrit ka ryta kim lah ban saiñdur satia ha ka rukom ba dei namar ïalade ruh kim pat shemphang bha ne kim pat iar ki jingmut jingpyrkhat la hap noh pynban ha ka ban sneng ban kraw khun kane keiñ ka buh pat ïa ka lawei jong ki samla ha ka jingeh.
Te shuh shuh lada ngi phai pat ha kane ka juk shai kaba mynta khamtam ïa kiba la heh la san kiba la khraw ka jingnang jingtip bad kiba la don ka kyrdan khamtam kiba long kum ki nongïalam ïa ka ri bad ka jaitbynriew ki la dei ban pyni kham bun ki nuksa kiba bha sha ki khun samla jongngi ba kumno ban tei ïa ka ri bad jaitbynriew pynban ngi iohi ka long da khongpong ka pynshlur pynban ban leh ïa kiei kiei kiba sniew mano pat keiñ ban pyni nuksa lem ïa ki khun samla lada ma ngi kiba la san ngim pyni.
Lada ngi phai khyndiat ïa ka mynnor bad sotti juk da kaba puson bad pynshong nongrim ha kito ki por kiba la leit noh la sngewthuh ba wat la ki briew kim don ka jingnang ka jingtip kum ha kane ka juk stad kaba mynta phewse ki briew ki im kum kiba la shai ki tip bad sngewthuh ruh kumno ban ri la ka burom ka akor ha ka iaid ka ieng ha ka kren ka khana ha ka riam ka beit ym don shuh ka tuh ka lute ka thombor lehbor, ka jingïapynïap, ka bam klop ka leh klop ne ka khwan myntoi shimet bad ki leh ïa kiei kiei kiba bha kiba long ki nuksa sha kiwei.
Hooid lehse ha kane ka juk stad kaba mynta ki briew ki la shai ngi la dei ban kham pynjanai ïa kaei kaba la pruid dak da ki longshuwa manshuwa pynban ha ngi mynta nalor ba ngi la shai katkum ka por pynban markhongpong.Te dei hangne keiñ ka pynduh jingkyrmen haduh katta katta ïa ki khun samla kumno keiñ ki khun samla jongngi kin long ka lawei ba phyrnai ïa ka ri bad jaitbynriew lada khlem iohi shuwa ïa ka nuksa na kiba la san.Te ha kane ka por kum ka jingkyntu ïa ki khun samla jong ka bri u hynñiewtrep ba phin sdang noh mynta ha ka ban ieng ha la ki jong ki kjat bad ban peit jngai namar ka ri ka donkam palat ïa phi ban long ki nongialam ha ka ban saiñdur thymmai ïa ka imlang sahlang kaba phyrnai.
