Ka jingwan rah ka party VPP ha kane ka Assembly ba dang shu dep ïa ka mat ban peit ne pyrkhat biang ïa ka Reservation Policy bad ka Roster System katkum ka rai jong ka Meghalaya High Court ba donburom ka la pynkhie im biang sa shisien ïa katei ka mat kaba ktah mat ïong ïa ka ïohkam ïohjam ki khun samla jongka ri Khasi-Jaiñtia jong ngi. Wat la ki seng bhalang baroh na Garo Hills ki pyrshah ïa ïap ïa im halor kane, ki kynhun na Khasi-Jaiñtia te kin ïai ktik beit ba ki shah long langkñia ei ha katei ka policy.
Ka jingpynkhie im ïa katei ka mat ne issue kan pynktha khlieh shi katdei eh ïa u Chief Minister ka Meghalaya lem bad ki kynhun jong u. La ïohi ruh ba katei ka system ka la phiah arliang ïa ka Meghalaya ha ki ar kynhun ki jaitbynriew (ST), kata, ki Khasi-Jaiñtia bad ki Garo. Kumba ka long mynta, katei ka policy ka pynïoh nong eh ïa ki jaitbynriew Garo. Lada ka sorkar kan pynhun ïa ki Khasi-Jaiñtia ruh ka la wai artad ha Garo Hills. Bad lada ka pynhun pat ïa ki jaitbynriew Garo kumba long mynta, kan wai artad ha ri Khasi-Jaiñtia ruh. Kan don ka jingktah ruh wat ïa ka lawei jong ki political party kiba ïa don lang ha kane ka sorkar MDA-2, la ki long ki regional ne ki national party.
Lada kane ka sorkar MDA-2 ka leh mynthi ruh ki paidbah kin nym aili satia ïa ka. Lada kane ka thma ïoh kam sorkar kan khie shisha, ka jingïadei hapdeng ki jaitbynriew Khasi-Jaiñtia bad Garo kan nang ïa jngai nang ïa jngai shuh shuh bad kan sa poi ka por ba ki lah ruh ban ïa khlad lok noh shisha da kaba ai noh ïa la ka jong ka jong ka state jongki.
Kane ka mat ka long ruh kaba don jingma bha haduh katta katta (very sensitive). Lada ka sorkar u Conrad Sangma kan bakla rai hangne, kan sa jot artad baroh shi rta bad kan shitom ruh ban khie khlieh biang hadien habud. Dei hangne ba ki ju ong, “Lada ai ruh ym long bad lada ym ai ruh ym long”. U la wai lada u leh bad u la wai ruh lada um leh. (He is doom if he gives, he is doom if he does not give).
Da u Babu Kular Khongjirem
