U Blei Kynrad u long ka tynrai jong ka jingstad kumta u la thaw bynriew buh bynriew ha snieh jong ka Mei Ramew. U la thaw bad kynthei bad shynrang ïa baroh ki jingthaw ba im ba kin dup roi parum pareh ha sla jong ka mei mariang. Te pyrkhat katne kata ka jingstad jong u ba haduh ba u la sam bynta lang ia kata ka jingstad jong u, sha baroh ki jingthaw. Ka jingstad kaba ngi ioh ka dei ka bynta jong u namar dei hi ma u. Mano mano ruh un ym lah ban pynlong hi ïa kane ka jingstad, lymda um ai hi da u KYNRAD. Namar ka jingstad shuwa ban thaw ïa kiei kiei baroh ka la don lypa ba dei hi u KYNRAD. Kumta u KYNRAD u la ai ïa kane ka jingstad tang ha u khun bynriew khnang ba un lah ban pyniaid ïa ka pyrthei ha ki bun ki liang. Bunsien ngi ki briew ngi ju ong wow! uta kata ka briew u long ne long kaba stad.
Hooid kaba dei ban ïaroh ïa kata ka jingstad ba u KYNRAD u la bsiap ha ka jabieng jongno jongno ba kin lah ban pynmih ïa ka bor sngewthuh, pule trei kam wat ïa kano kano kaba ïa dei ha ka science bad technology ruh.Naduh dang khyllung, khynnah, samla haduh rangbah, u KYNRAD u la seng lypa ïa kata ka jingstad hapoh ka jabieng u khun bynriew. Kat kaba u khun bynriew u trei dei ka jingstad kaba wan na u KYNRAD. Te ngi sngewthuh ba don tang uwei uba stad bad u sam lem ha ngi ïa ka jingtip ba yn lah ban leh eiei ha pyrthei.Namarkata kum ki briew ngi dei ban pan ïa kane ka jingstad, na uta u Trai jong ka jingstad. Shuwa ban trei kam ne pule ne thoh bad ruh ynda la dep ki khun bynriew ki dei ban sheptieng ia u KYNRAD nyngkong.
Shuwa ban thiah bad ynda la khie thiah dei ban ainguh ïa uta uba ai ïa ka jingstad.Lada u khun bynriew u pynmlien ban pan bad ban ainguh ha u KYNRAD ïa kaei kaba la ioh pdiang kan sa long ka jingsdang jong ka jingstad. Te hadien kin sa ioh deng ïa ka pansngiat jong ka jingstad. Ynda la deng ïa ka pansngiat jong ka jingstad kin long barabor kiba dap jingkmen hangne kin ioh ruh ïa ka jingkoit jingkhiah. U thied jong ka jingstad bad ki briew ki ioh pdiang kan sa long ka jingim ba jlan ha shi lynter ki sngi. Ha ka jingstad yn ym don ba lah ban thied namar kata ko paralok to ngin da sngewthuh ba ka long kaba eh bad ba jwat ban ioh ïa ka. Ban ioh ïa ka jingstad kan ong ka jingtynjuh ba khraw ïa phi ïa nga bad baroh lymda ym don ka jingtrei shitom ban dup jop ïa ka. Ban ioh ïa ka jingstad ha ngi ki briew, nyngkong eh da ka jingshah shkor ïa ki kmie ki kpa bad sngap ïa ki tien sneng jong ki riew tymmen ha la ïing ha la shnong bad hangno hangno ruh.
Ban ioh ïa ka jingstad kum ki khynnah sngap ïa ki kyntien shong sbai jong ki riew rangbah la ha shnong skul, nonghikai, nong sneng lem. Bad ynda la ioh ïa ka jingstad, kan long ka jingkmen jingiphuh iphieng ryngkat lang bad ka suk mynsiem jai. Kum ki briew ha pyrthei dei ban pyndep ïa ki kamram leh da ka jingjemnud bad da ka jingieit ïa la ki kam, te u KYNRAD un ai ïa ka jingstad. Naduh dang khynnah sdang ban hikai haduh ban da rangbah ban ym ibein iano iano ruh lada duk ne riewspah dei ban ieid para nongshah thaw, khnang ba u KYNRAD un ai ïa ka jingshemphang bad ïa ka jingstad.
Ki khynnah ha skul ki rangbah ha la ki jingtrei lada ieit ïa la ki kamram la ha ïing ha lum, ha office, ha skul ki ioh ïa ka jingstad. Ki briew ba don ïa ka jingshlur bym ju lehrain ïano ïano ki ioh ïa ka jingstad. Bad kane kan kyntiew ïa ki ha ka burom, la ha ki kmie ki kpa ki para shong sah ryngkat la hangno hangno ruh. ngi dei ban kynmaw barabor ba ka jingmlien ban ong bieit ïa kiwei kiwei ruh kin ong bieit kylla namar ngim iohi ïa kata ka jingbieit la jong. Haba ïa kren badno bad no ngi dei ban kynmaw ban ym ong kat shaba lap bad ym ju dei ban leh tuiñ tuiñ leh smat ïa la ki kamram ban dup ioh ïa ka jingstad. Ki briew kiba stad kim ju kren byrthen kum u sing la ha ïing la jong ne hangno hangno ruh. Bad kam long ban wohdong parabriew ha pyrthei la bad ki kmie ki kpa ne ba la rangbah.Ki briew kiba ioh ïa ka jingstad haba shim eiei ba ai para briew kim ju kner kti ma dei ki da pyrkhat ba ioh ym lah siew kylliang ïa ki. Kynmaw paralok ym ju dei ban buh mynsiem tang ïa la ka spah, bad ong ba nga dei u ne ka khun ba bit ba biang bad yn ym don ba lah ïa nga. kane ka jait mynsiem kam dei ka jingstad.
Dei ban kynmaw barabor ba ka spah bym hok kan ym myntoi eiei ha ki por jong ka jingkordit. To da kynmaw ba tang ka jingstad ka dei ka spah ba kordor tam eh. Haba don nongkren mano mano ngi dei ban long ba kloi ban iohsngew hynrei shuwa ban jubab ngi dei ban pyrkhat bha. Ynda la sngewthuh ngin sa jubab la para khynnah nonghikai ne kiba la san la rangbah ne badno badno ruh dei ban leh kumjuh. Ym ju dei ban buh jingshun parabriew ne badno badno da kaba pynmong ia ki da ki jingleh jingkren jongngi pyrshah ïa ki. pynban ngi dei ban ïa ieid parabriew wat para jingthaw khamtam ïa kiba la kham rangbah lada ngi la leh kumta ngi la ioh ïa ka jingstad.To ngin long ki briew ba sngur mynsiem ym ban pynjahburom ïalade ioh ngin lehraiñ kylla. U ne ka briew ba tip akor u ne ka ioh ïaroh parabriew khamtam na u KYNRAD.
Ban ioh ïa ka jingstad dei ban sdang naduh dang khynnah ka burom yn ioh ynda la rangbah. Ki khynnah skul ki dei ban ieid ïa la ki jong ki nonghikai kumjuh ruh ïa ki jong ki kmie ki kpa ynda la rangbah U KYNRAD un ai ïa phi ïa ka jingstad lada wad ïa ka. Haba phi dang ïa pule la ha ki skul rit, ne skul heh phi dei ban lur bha bad bet bha ha kaba khatduh phin ioh kheit ïa u soh jong ka jingstad. Kane ka kyrteng jingstad. Kane ka kyrteng jingstad ym ba baroh kin lah ban twad lait tang ka jingminot bad jingkohnguh yn ioh twad ïa ka. Phi ki khynnah lada phi pynleit jingmut bha ha ki jinghikai phin kylla long uba sian ban wad ïa ka jingstad, phi dei ban ieid bad shah shkor ban dup ioh jingnang. Ynda la nang phi dei ban duriap ban sngap ba phin dup long u ne ka bastad.Kum ki khynnah dei ban kynmaw ban sngap barabor ïa ki jingkren ki riewtymmen namar ki kham stad ma ki ban ïa phi te phin ioh ruh ka jingstad na ki. Ki khynnah ki dei ban long ba kloi ban shah shkor ia kano kano ka jingiathuh ki riew tymmen, wat leh kumba ym salia ïa ki tien hikai ne tien sneng jong ki ioh duh ïa ka jingstad. Wat ju pan ïa ka kyrdan bah eh ne ka jaka shong ba khraw ne wat ym bishar ioh phi duh noh ïa ka burom jingstad.
Wat ym long law law bad ki paralok ne wat rkhie bein ïa ki raitoi wat ju thok ïa ki para khynnah skul ne nonghikai kumjuh ïa ki kmie ki kpa pynmlien ban lehrit phin dup ioh ïaka jingstad.Ha ka jinglong briew la khynnah ne rangbah yn ïa lang paralok barabor bad ki riew nangang ym tip ba yn ioh kheit bun u soh jong ka jing nangang. Namarkata kiar ïa ka jingïalang lok bad ki riew nangang ioh duh noh ïa ka burom bad ka jingstad. Ym ju dei ban beiñ ïa u ne ka briew ba la tymmen dei ban sngap ïa ka jingkren ki riew tymmen ba kham stad ban ïa phi ïa nga ba yn ioh myntoi ha lade. Ym ju dei ban mlien ban ibeiñ ïa ki namar na ki ngi ioh ka jingstad ba thymmai. Ym ju dei ban sah pynngop ïa lade ha ki riew kyreit ioh ba shah ibein lang ban ïa iaid lang bad ki riew khong dukhi bieit lah ban ïa kynduh jingwit na ka jingkren pathar katba mon jong ki.
To kynmaw ba ki riew dom riang kim kheiñ kor ïa ka snam u paralok la jong. Lada iaid lang bad ki riew dom riang yn ïa ngat lang ha ka bieij lang dom lang bad kiba ym ju dei ban leh stad ha khmat u nongwei nongar ne u soh shnong ioh u leit that ïa ka jingstad jong phi baroh.Pynban dei ban ïa dei jingmut bad ki ne para marjan ban wad jingstad na ki kaba thymmai.Ha ka jinglong briew dei ban long u ne kaba stad ban ïa lang paralok bad dei ban pyrshang ban ym leit rung klumar ha ïing jong ki ne wat ïalam ïano ïano ruh sha ïing la jong namar ym lah tip ïa ka buit thap jong ki. Ia ki riewthrang snam dei ban hikai da ka jingieit ne lah ban ym ïa lang paralok bad ki ioh kin pynkylla khongpong ïa ka dohnud kiba bha ym ju dei ruh ban kyrni ïa ki jingsniew pyrshah ïa ka jingsngewthuh namar kim wanrah jingbha ha la ka jingim ki pynlong pynban ka jingjot bad duh ïa ka burom jingstad.
Ban ioh ïa ka jingstad dei ban da puson bha shuwa khnang ba yn jop ïa ka ba pynshong nia bin pa bin shuwa bay n trei kam khnang ban lait na ki jingbakla. Ym ju dei ban kynnoh ïa kito kiba ai jingtip ba ki bakla namar ka lah ban duh noh pynban ïa ka jingtip ba pura. Dei ban long barabor ba kloi ban pan map wat lada ym don jingbakla ha khmat ki kmie ki kpa bad kiba halor jongngi. Dei ban kynmaw ruh u bieit bym don jingstad u dap tang ka jingkhnium ka beiñ briew. Lada shem ba long kumta dei ban kiar ba ioh duh pynban ïa ka burom jingstad. Ngi dei ban nang ban hikai na kiba stad kumno ban kren namar ka por ka iai kylla bad dei ban sdang ia ka jingstad ba thymmai ym ju dei ban ïa mlien ïa ka jingkwah brai ka dih ka bam ka iaid awria ka tuh ka thiem ka ïa shun ïa pen ka lorni ïa kiwei baroh lyngba ka jingsynshar lade ban lait na ka jingshah rkhie beiñ ha ka pyrthei. Dei ban iai pan ha u Kynrad da ka jingsngewrit bad ka jingieid ïa u bad ban ioh ïa ka jingstad. Ka jingpyndep ïa ki kamram la barit ne ba heh da ka jingieid hangta ka don lang bad ka jingstad. Ki khun kiba stad ki pynieid ïa la ki kmie ki kpa bad nonghikai da ki ktien dem bad da ki kam ruh.
Ngi dei ban kynmaw ba ym ju dei ban bam smai ïa kano kano ka kam namar ka jingbam smai ka long ka kam bymman. Ki khun jingstad ki dei ban tuid kum ka um na kit long ban sam sha ki nala ban dup pynlong ka wah bah. Te ka jingstad ka ai jingïaroh ïa lade ïa kiwei ruh bad ka pynlong ïa u ne kaba khraw.Haba ïa kren badno badno ym ju dei ban phai kynriang khmat bad ruh ym ju dei ban mlien ban shim eiei da kaba shu khnap namar kam dei ka shemphang jingstad. Kynmaw ngim dei ban kawang maw sha suin ioh un hap kylla halade hi. Haba don ka ïa ka jia ma jia hapoh shnong ne hangno hangno ym ju dei ban kynton diengiap ioh ba ka wan thang kylla sha lade.Barabor dei ban pynlip ïa ki phylliah ding ba kan ym klang ba ioh jah burom bad jingstad. Nangta pat kum ki briew dei ban leh adkar haba khot bam mano mano ym ju dei ban bam lalot, ioh shah rkhie bein ha kito kiba ïa bam ryngkat lang. Te kum ki briew kiba nang ban kynshew ïa kiei kiei kiba thymmai bad ba bha u ne ka kynshew ïa kiei kiei kiba thymmai bad ba bha u ne ka kynshew ïa ka jingstad. Ainguh ha u Kynrad uba ai bad pyndap ha baroh ïa ka jingstad namar u dei u tynrai jong ka.
Da u Bah C Jyrwa
