(Loukas 2:10- Hynrei uta u angel u la ong ha ki wat sheptieng naba ha khmih nga wallam ha phi ïa ka khubor babha ka jingkmen bakhraw ka ban long ha ki briew baroh).
Ka Khristmas ka dei ka aiom jong ka jingkmen bad ka jingkyrmen ban pyndonburom bad ban kynmaw ïa ka jingwan longbriew jong u khun u Blei u Jisu Khrist.Kum ki Khristan haba la wan kane ka aiom ngi pynkhreh pynkhrum naduh ki ïing ki sem ki riam ki beit ki ïingmane bad ngi phah ki jingaikhublei (Greeting Cards) sha kiba ieit ba thoiñ jongngi bad ngi ïa kmen ïa sngewbha la ka long bad ki ba ha ïing ba ha sem ki lok ki jor ki marjan marpa ki parabangeit kumta ter ter.
Kaba sngewsih ba don napdeng jongngi kiba pynlong ïa ka tang kum ka tamasa aiu re ban pynthohbria ïa ka jingkhraw bad ka jingdonbor ka kyrteng u Jisu Khrist u Nongpynim jongngi ban ïalam bakla ïa kita ki bym pat shym la tip bad ithuh ïa u Jisu Khrist bad kaba ishyrkhei haduh katta katta ka long ba don napdeng jong ngi kiba shim kabu ha kaba pynthohbria ïa la jong ka jingim ïa kaei kaba ka ktien u Blei ka khang pyrshah ïa u khun bynriew.
Haba ka aiom Khristmas ka la wan ki bynriew ki pynjam ïa ki sur iaroh lyngba ki jingtem jingput ki pynlong ki jingïalehkai sngewbha ki jingai sngewbha ki jingïabam sngewbha kaba dei katkum kane ka samoi.Lada kine ki jingleh sngewbha ki long ban ïaroh ïa u Trai balei pat ngi pynjah burom ïa ka tynrai jong ka ïingmane jongngi da kaba ngi buh ïa ka thong jong u bilor ha khmat jongngi, ngi ai khublei ïa ka Khristmas bad ka jingjawsheh nangta bad ka sma jyndem namar ba la shoh ka sngewbha Khristmas.Kaba kumno ka jubab ngin ai sha kita ki bym pat sngewthuh ïa ka jingmut jong ka bad kumno ngi ïalam bakla ïa ka jingmut jingpyrkhat jong kiba dang khie dang san.Ki jingpyrkhing la ka long na ka aiñ na ki shnong ki thaw bad na ki kynhun seng bapher bapher ki don kane kam lah da lei lei ban teh lakam lada ma ngi shimet shimet ngim lah ban long kita ki khun bynriew kiba sngewnguh ïa ka khubor kaba la wallam ha ngi.Ha ki snem bad ki por ba la leit noh baroh ngi iohi ïa ki dak ki shin kiba la ïalam bakla ïa ka jingmut jingpyrkhat jong ki katto katne ki briew kiba dang duna ha ka jingtip bad jingshemphang kaba la pynlong ïa ka daw ba katba nangmih ki sngi ka jinghiran jong kita kiba dang rit ka jingngeit ka la nangtlot nangswai.
Ka jingshim kabu jong ki nonghikai khamtam u nongwei nongar ha kine ki aiom ha ka ri jongngi ka long kaba la ktah jur haduh katta katta khamtam ïa u kup shiliang sem shiliang ki rangli ki juki bad katno tam ïa ki khunswet khun shempap.Hynrei ka long ka burom ïa ki seng trei mon sngewbha kiba la ju noh u synniang jong ki sha kiba kum kine ki khun ki hajar naduh ki shado ki shadia ki khunswet khun shempap ki rangli juki da ki jingai sngewbha kaba ki don kat lah ka bor jong ki.
Kine ki dei ki sngi kiba ki jingjynjar jong u khun bynriew ki la nang tap ïa ka long rynieng jong u bad ka jingkwah rhah ïa ka bym dei ka hok ka la ker tawiar ïa ka jingmut jingpyrkhat jong u ngi iohsngew ïa ki khubor jong ki nongtuh nongthiem ki bym salia shuh namar ba la dei ki sngi ki ïa jong ki nongsiew nongtda kim man salia shuh wat ban jrong ki kti ki kjat kham bunsien hi u briew uba leh ïa kane ka kam u dei uba sngewthuh bha ïa ka jingmut jong ka ynnai ïa kren ïa u bym tip eiei namar kaei kaba u leh ka dei tang ka jingkwah brai ka doh jong u.Hato ka jingwan longbriew jong u khun u Blei bad ka jingleh sngewbha ha kane ka sngi jong u ka long ne em kaba la ïalam bakla bad kaba pynsngewthuh bakla ïa kiwei pat namar kim shym long kita ki briew kiba sngewthuh ba la kha ïa u ha ka jinglong rit bad jinglong duk (Loukas 2:7) ka ong kumne “Te ka la kha ïa u khun uba nyngkong jong ka bad ka la sop ïa u da ki jaiñsop bad ka la pynthiah ïa u ha ka shyngoid naba ym don jaka ïa ki ha ka ïing basa.
Kum ki paid riewngeit Khristan to ngin rakhe ïa ka Khristmas da ka mynsiem ba shitrhem ba ngin wanrah ka jingkylla bad ngin wallam ïa ka khubor jingsuk sha ki paid bynriew baroh.Kumba ka ri bad ka jaidbynriew jongngi ka dei ka jaidbynriew tipbriew tipblei to ngin pyndonburom ïa kane ka sngi bad kane ka aiom kum ka jingkyrmen ban pynkyntang ïa la ka jingim jingman sha uta uba dei ban ioh ïa ka jingïaroh uba la kyrkhu bad pynwandur ïa kane ka pyrthei kumne mynta.Ngin long kita kiba iehnoh ïa ki jingkwah brai ka doh ngin ym ailad ba kiwei kin tuklar ïa ka jingim shimet jongngi hynrei ba ngin long kita kiba skhem nalade.Lada kine baroh ki synshar ha ka jingim jongngi iwei pa iwei to tip ka khubor ba ngi pynsaphriang sha kiwei kiba donkam ïa ka jingsngewthuh bad ka jingpynshai kan long kaba dap biang ha baroh salonsar bad kaba la kyrkhu ha ki jaidbynriew baroh.
“KA KHRISTMAS BASUK ÏA PHI”
Nara Uriah
