Lada ngi pynshong nongrim bha halor kitei ki jingkylli kiba nga la pruid dak haneng ki long kiba jylliew haduh katta katta ban pyrkhat bun na ngi ki Khristan lehse ngim ju pynleit jingmut haba ngi rakhe ïa ka Khristmas ngi sngew beit ba ka por Khristmas ka dei ka aiom lehkmen leh sngewbha bad ngim ju tip ne bniah ba ka mut aiu ka Khristmas lane kaei kaba ngan leh ha kane ka Khristmas? Haba ngi peit ha kine ki sngi kiba mynta lei ngi I duh jingkyrmen haduh katta katta namar la jyllei da ki jingsniew ki jingthala ba har rukom bad kiba shyrkhei kiba kah dum ïa ka jingim jongngi ka jingsuk ka jingtngen ha kane ka sla pyrthei ka la nang jah lngaid noh katba dang mih ki sngi ki por ngim lah shuh ban sngewthuh ïano ngin kynnoh hynrei watla katta ruh lada ngi pyrkhat ba ka jingwan ka Khristmas ka long ban pynkha ïa u Jisu uba long u Syiem jong ka jingsuk hapoh ka dohnud bad ka mynsiem jongngi, te khlem pep ka pyrthei kan sa ioh mad biang ïa ka jingieit bad ka jingsuk jingtngen lyngba jongngi lym kumta ka long kaba eh haduh katta katta ban pyrkhat.
Khyndiat lada ngi phai halor kitei ki jingkylli kiba nga la buh kaei ka Khristmas? Bad kumno ngin pynkhreh ïa ka jingwan ka jong u Trai Jisu? Lehse don bun na ngi ki jubab ba ngin ai.
1.Don katta katne ki bym sngewthuh ki ong ba ka Khristmas ka dei ka lehkmen leh sngewbha, ka shad ka kmen ka tamasa ka put ka tem bad kumta ter ter.
2.Kiwei pat ki ong ka Khristmas ka dei ka jingïakynduh paralok ka jingïakynduh ba ha ïing ha sem ki kha ki man.
3.Don pat kiba ong ba tang shu poi ka Khristmas ngi ioh ban ai sngewbha markylliang (present) lyngba ki song kiba la sop pynitynnad ban iphuh iphieng da ki rong ba bun jait kiba thaba shisha da ki khmat ban peit.
4.Bad ha ki katto katne pat ka Khristmas ka dei ka jingïaleit kai sngewbha shane shatai ryngkat ka dih ka bam ka buaid tang lang ka ïa shoh ka ïa dat bad ryngkat ki ktien kiba sniew bad kumta ter ter.
Te lada ka jingrakhe Khristmas ka long ha kum katei ka dur ne tang ha ka rong phong pyrthei kat ka mut ba ngi leh tang ban shu dep rukom ngim ngam jylliew ba kaei ka Khristmas? Ne ka mut aiu ba ngin rakhe ïa ka Khristmas?Hynrei na ka bynta ki Khristan kiba sngewthuh pat ki ong ka Khristmas ka dei ka aiom kaba dap da ka jingkmen bad ka jingkyrmen ka dei ka por ban duwai bad ban kylla kaba mut ka dei ruh ka por ka ba ngin kynmaw kyrpang ïa ka jingwan long briew u Trai Jisu sha kane ka sla pyrthei ban ai jingim ïa ngi kumba u Trai Jisu u la ong hi “Nga la wan ba kin dup ioh jingim jingim kaba pura” (Ioannis 10:10).
Te lada ngi phai shaphang ka Khristmas ngi sngewthuh shai ba ka por Khristmas ka dei ka por bad ka aiom kaba ktik haduh katta katta ïa ki jingmut ki jingpyrkhat bad ïa ka dohnud briew baroh.Satlak ka pyrthei naduh ki samla ki tymmen haduh ki khynnah katno ki dap da ka jingkmen bad ki sngewphuhmut phuhmat ha la ka jong ka mynsiem.Ngi ruh ïa ki nuksa ne ki dak ki shin kiba paw shabar ba tang shu wan ka Khristmas ngi pynriam pynbeit ngi pynphuh pynphieng ngi ñiad pushara bad ngi ai rong ai rup ïa ki ïing ki sem baroh ngi kwah ruh ba ka phyllaw ïing (compound) kan khuid kan suba ngi jynrat bad thiew ïa ki ñiut ki ñier peit ki ïing ki sem ha shnong ha thaw la ha sor ne ha nongkyndong katno ki thaba da ki jingitynnad haba la poi ka por Khristmas kumjuh ruh wat ki briew ki ju thied ïa ki jaiñ bad ïa ki juti thymmai khnang ban ioh phong ha ka por Khristmas.Te kine kiei kiei baroh ngi sngewthuh ba ki long tang ha ki kynja doh.Hato na ka bynta ka mynsiem ba kordor ngi ju pynkhreh janai ne em? Namar kam pat biang pura tang kitei kiba la pruid dak haneng ngi donkam ban pynjanai ïa ka dohnud bad mynsiem jongngi ruh ba ka dei ban long kaba khuid bad kawei ruh ba ngin sloit noh ïa ki jingmlien kiba sniew baroh kiba ngi ju ïaleh baroh shi katta bad ban im pat da ka jingim kaba thymmai bad ban ïarap lem ïa kiba duk kiba rangli da ki kam leh isynei lem kumta long lehnohei ka jingpynkhreh jongngi ïa ka Khristmas namar u Trai Jisu Khrist u kwah ba ka dohnud jongngi kan long kaba khuid bad u kwah ruh ban rung bad ban shong ban sah ha ka dohnud bad mynsiem jongngi.
Te kane ruh ka long kawei ka mat puson ha kaba ïa dei bad kane ka Khristmas, ym slem shuh sa tang shi bnai duna ngin ioh ban rakhe ïa ka Khristmas ha kaba ngin ap khmih lynti ïa ka jingwan u Trai Jisu uba dei ma u shisha uba kit ba bah khala ïa ka pop ka sang jongngi baroh da kaba pjiar ïa la ka snam ba kordor bad ban iap thadrong halor ka diengphna.Ka jingthoh bakhuid ka ong “Ba u Blei u la ieit katta katta ïa ka pyrthei haduh ba u la aiti noh ïa la u khun ba marwei uno uno uba ngeit ha u un ym iap shuh hynrei un ioh ïa ka jingim kaba bymjukut”.
Hato ngi la pynkhreh shisha ba u Trai Jisu Khrist un ioh ban rung ha ka dohnud? Hato ngi ju duwai da ka jingriewblei bad shitrhem khamtam kum ha kine ki sngi ki jingpynkhreh jongngi ïa ka jingwan ka jong u Trai Jisu Khrist ne ngi kynmaw bad ngi phai sha u Blei tang ha kaba ngi ïa kynduh jingeh ne sngew kut lad? Kane keiñ ka long ka mat puson kaba ngin tih jylliew bad pynshong nongrim bha namar u Blei u iohi bad u tip lut ïa ka jingthmu bad ïa ka dohnud jongngi baroh.Te shuwa ba ngan pynkut noh ïa ine i mat puson ba khyndiat jongnga te to ai ba kane ka Khristmas ka ban sa wan kan long ka Khristmas kaba i shongkun shong Blei ban don ka mynsiem ïa ieit bad ïa map ruh iwei ïa iwei ryngkat ki jingrwai ïaroh ïa u Blei bad jingduwai puson.Ngin pdiang ïa u Trai Jisu Khrist ha ka dohnud bad ka mynsiem jongngi bad ngin long ruh kiba la pynkhreh bad pdiang hun ïa ka jingwan ka jong u kum u khun u Blei uba shisha uba ngi ap bad ngi khmih lynti ïa ka jingwan jong u ha ka Khristmas.
Da u Bah N.Francis L.Thabah
