Ka jingrakhe Khristmas lehse dei tang ha ka pyrthei ba la leh kynmaw burom da ki Khristan bad ki bym long Khristan kumjuh.Kumta ki don la ki jong ki jong ki jingsngewthuh bad rukom rakhe ïa ka.Hynrei kane ka khubor Khristmas ka dei na ka bynta ki bangeit Khristan.Wat la ngim da tip thikna ïa ka sngi kha u Jisu hynrei ngi ngeit katkum ka ktien u Blei ba 2000 snem tam mynshuwa la kha ïa u Jisu ha Bethlehem Judia (Math 2:1, Lk 2:7) kumba la ïathuhlypa dei u Isaiah bad Mikah (Is 7:14, Mikah 5:2) kumba 700 snem shuwa ban kha ïa u.Ka khristmas namarkata ka dei ka sngi jinglehkmen kaba kyrpang ha ka jingshakri ba kynja mynsiem kiba ngeit ban kynmaw ïa ka sngi kha u Jisu Khrist uba la wan ban ai ïa kata kaba donkam tam jong u briew kaba dei ka jingpynim.
Ka mynsiem Khristmas kaba shisha ka sdang haba ngi pdiang ïa kane ka jingai jong u Blei ïa la u khun khnang ban ngin ioh ia ka jingim bymjukut bad jingioh map na ki pop (Ioannis 3:16, Rom 6:23) jongngi.Kawei pat ka jingai jong u Blei dei ka jingdon ryngkat jong u Blei uba ju iai don ryngkat bad la ki briew ha man la ki por bad jaka.Haba u Moses kum u nongïalam ki khun Israel u sngewduh jingkyrmen, u Blei u ong, “Ka khmat (Jingdon ryngkat) jongnga kan leit lem bad me” (Eksodos 33:14).U Syiem David u sngew skhem ba um sheptieng ïa ka syrngiew ka jingiap “namar me don ryngkat ma me bad nga (Salm 23:4) Shuwa ba un leit phai sha bneng.U Jisu u la kular ïa ki synran jong u ha khmih ruh nga nga long ryngkat bad phi ha la ka sngi haduh kaba wai noh ka pyrthei (Math 28:20).U Blei u iai don ryngkat bad la ki jong ki briew ha man la ki por ki jaka bad jingjia baroh.
Sa kawei pat ka jingai jong u Blei dei KI JINGKYRKHU JONG U HA KI LIANG BAROH.Dei ma u, uba ai ïa ka jingkoit jingkhiah ka jingioh jingkot ka jingjop ka burom bad jingsuk jingkmen hapoh ka mynsiem.Naba u Blei kum u Kpa u la ai ki jingai ba bha bad ba janai baroh ngi dei ban sngewnguh ïa u. “To long noh ka jingainguh ïa u Blei namarkata ka jingai jong u ka bym lah ong shuh” 2 Kor 9:15 & Jakob 1:17).
Ka jingai ba kongsan tam jong u briew pat sha u Blei dei ka dohnud bad ka mynsiem jong u, u Blei u ong “Ko khun to ai ha nga ïa ki dohnud jong me” (Proverb 23:26).Kaba mut ba ngin pdiang bad aiti lut ïalade ha u kaba ar ka jingai jongngi dei ka por.Ha kane ka juk jingïabeh jingstad jingnang kam bad spah pyrthei ngi shem bun eh ki briew kim ju don por na ka bynta u Blei.Wat ha kane ka por rakhe Khristmas ki briew ki kham pynlut por bad la ki ba ha ïing ha sem paralok parajor.Kumjuh ruh ha ki jingïaleit lehkmen bad ïa bam ia dih sngewbha ban ïa kaba pynlut por bad u Blei bad leit sha ka ïing jong u.Ki riewstad ki la pynlut por kumba lai bnai eiei ban leit wad ïa u khunlung Jisu ha Bethlehem haduh ba kin poi pat sha la ka jong ka ri jong ki.Ngi pat katno por ngi ju pynlut bad u Blei ha ki Aiom Khristmas?
Kaba khatduh kaba u briew u dei ban ai sha u Blei dei ki jingdon jong u.Ki riewstad ki la ai ki jingai kiba kordor tam ïa kaba ki don.Ka Ksiar ka jingiwbih bad ïa ka mir de (Math 2:11).Hynrei kham bun na ki nongrakhe Khristmas mynta ki kham pynleit jingmut bad pynlut ha ki jingthied jingriam jingbeit ki tiar jingpynriam itynnad, ki card, jingbam bad cake Khristmas.Ki jingïa ai sngewbha bad jingïaleit bam leit dih sngewbha ban ïa kaba ai sha ka jingainguh bad na ka bynta ka kam u Blei.Une u khunlung Jisu shen shen un sa wan pat kum u Syiem ki Syiem katno ngin ai bad kyrshan ïa ka kam ïalap ïa ka KHUBOR BA BHA KA JINGPYNIM JONG U?
Ka Khristmas ba suk ïa phi baroh.
Rev Dr. Maniwell S.Nongrem
