Ba bteng …
Ai ba u samla un wad ïa ka ban ïeng ha syndah jong u ha ka jingkit ïa ki jingkhia ka jingim, kaba ka bor ktah jong ka kan long ïa ka ban pyndon burom bad kham pynbha ïa u, bad ka ban pynkmen ïa u da ka jingieit jong ka. (Ka Jingim kaba bha tam.” Sla.21.) KA JINGKITKHLIEH JONG KA JINGSHONGKURIM: “Ia ka jingbuh-beit jong ka jingshong-kurim la thmu skhem da ka Bneng ba kan long ka jingkykhu sha u briew; hynrei, ha ka jingmut kyllum, ïa kane la pyndonkam bakla ha kata ka rukom katban pynlong ïa ka ka jingtim kaba shyrkhei. Lajan baroh ki shynrang bad kynthei ki la leh ha kaba rung sha ka jingïadei ka jingshong-kurim la kumba tang kawei ka jingkuylli kaba ki dei ban rai-kut ka la long la ki la ieit ne em iwei-ïa-iwei. Hynrei ki dei ban ïoh shai bad sngewthuh bha ba ka jingkitkhlieh ka shongkhia halor jong ki ha ka jingïadei ka jingshong-kurim kham jngai ban ïa kane. Ki dei ban pyrkhat jylliew la ki khun jong ki kin don ka jingkoit-jingkhiah ha ka met ka phad, bad ka jingkhlaiñ bor ka jabieng, ka jingmut bad ka mynsiem. Hyrnei tang khydiat eh kiba ïaid lem bad ki jingthmu kiba hajrong, bad ki jingpyrkhat ba la kyntiew ïa kiba kim lah satia ban shu kynther noh na ki da kaba ñiewsting palat eh—ïa kata ka imlang ka sahlang ka la don ki jingdawa halor jong ki, ba ka jingkhia jong ka borktah ki dkhot ka longïing jong ki kan ïathuh shai ha ka jingñiew shajrong lane ka jinghiar shapoh ki tarajur—”A Solemn Appeal,” sla 63,64(Edition: Signs Publishing Company Limited). (na ka kot ‘Ka Khubor Sha Ki Samla’. Sla. 617,618) KA JINGJIED IA U NE KA BRIEW KA BA KIN IASHONG IASAH SHIRTA “Ha ka jingjied ïa u lok ne ka lok ha kane ka jingim dei ban da pyrkhat ïa ka jingbha jong ka met, ka jingmut, bad ka jingim bakynja mynsiem jong ki kmie ki kpa bad ki khun. Kata ka ban pynlah ïa ki kmie ki kpa bad ïa ki khun ban long ka jingkyrkhu ïa ki parabriew bad ban pyndonburom ïa U Nongthaw jong ki.” (Ka Jingim kaba bha tam. Sla.19.) KA JINGBISHAR BABHA BAD KA JINGSYNSHAR LADE HA KA JINGSHONGKURIM: Kaba peit shaphrang. “Shuwa ban pynroi-pynbun ïa ki dkhot ka longïing jong ki, ki dei ban pyrkhat bniah la ïa U Blei yn pyndonburom lane yn pynjahburom da ka jingwallam ïa ki khun sha kane ka pyrthei. ki dei ban ïai wad lada ban pyndonburom ïa U Blei da ka jingïasoh jong ki naduh kaba nyngkong, bad man la ka snem jong ka jingim ba la shongkurim jong ki. Ki dei ban pyrkhat jai-jai kaei ka jingpyndap ka jingpynbiang na ka bynta ki khun jong ki kaba ki dei ban pynlong.
Kim don hok ban wallam ïa ki khun sha ka pyrthei ba kin long ka jingkit sha kiwei pat. Hato ki don ka jingtrei, ka jingkamai ha kaba ki lah ban shaniah na ka bynta ban kyrshan ïa ka longïing, khnang ba kim donkam ban kylla long ka jingkit ba khia sha kiwei pat? Lada kim don, ki leh ïa ka kam runar-ruser ha kaba wallam ïa ki khun sha kane ka pyrthei ban shah shitom namar ka jingbym-ïoh ïa ka jingsumar kaba biang bha, ka jingbam bad ki jaiñ-ki sopti.” ‘Ka Khubor Sha Ki Samla’. Sla. 619,620) Ka jingsynshar jong ka jingbrai.
“Ha kane ka juk bastet, kaba sniew bad ba la troiñ eh ïa kine kiei-kiei ym shym la pyrkhat satia. Ka jingkwah babrai-ba-awria ka synshar donbor, bad kan ym pyndem sha ka jingsynshar, wat la ka jingtlot , ka jynjar ka lanot, bad ka jingïap ki long ka jingmih na ka jingsynshar jong ka. Ia ki kynthei la pynbor sha ka jingim jong ka jingeh, ka jingpang-jingktha, bad ka jingshah shitom, namar ki jingkwah brai bym lah synshar jong ki shynrang kiba bat ïa ka kyrteng ka nam kum “u tnga”—yn kham dei pynban ban khot ia ki “ki mrad.” Ki kmie ki pajut-patan ïa ka jinglong-jingim kaba lanot khop, lem bad ki khun ha ki ksangti jong ki lajan man ka por, ki da ïaleh shitom da kawei-pa-kawei ka lad ka rukom ban ai jingbam ha ki shyntur jong ki bad ki sopti ha ki met jong ki.
Katba kum kata ka jingsaja ka jinglanot ba la lum-la-kynton ka pyndap ïa ka pyrthei. Don tang khyndiat eh ka jingieit bashisha, kaba nylla, kaba aiti lut, bad kaba sngur. Kane ka mar bakordor ka long kaba kham ñiar ban shem. Ia ka jingkwah-brai la khot ka jingieit. Shibun ki kynthei ki la shah leh tohmet ïa ki jinglong bad ki jingsngew balung, bani jong ki, namar ka jingïadei ka jingshong-kurim ka la shah ïa u briew uba la khot “u lok,” “u tnga” ba un leh mrad ha ka jingïadei bad ka. Ia ka jingieit jong u ka la shem ba ka long kaba poh bad ka la kylla ngiah bad sngewjli noh.” ‘Ka Khubor Sha Ki Samla’. Sla,620) Ka Jingdonkam Ia Ka Bor Synshar Ia lade. “Shibun bah ki longïing kiba im ha ka jinglong jingman ka bym suk ka bym kmen tam eh, namar ba u tnga bad u kpa u shah ïa ka jinglong mrad ha ka jinglong tynrai jong u ba kan synshar donbor halor ka jingstad-jingshemphang bad ka jinglong ba kynja mynsiem.
Ka jingmih ka long ba ïa ka jingtlot bad ka jingnoh-mynsiem la sngew bunsien, hynrei ïa ka daw-tynrai ym shym la lah ban lap ban tip kum ka jingmih jong ka rukum leh bym dei biang jong ki hi. Ngi don hapoh ki jingkitkhlieh bashongkun sha U Blei ban sumar ïa ka mynsiem ba kan khuid sngur bad ka met ba kan koit kan khiah paka, ba ngin lah ban long ka jingmyntoi sha ka kynja bynriew, bad ai sha U Blei ïa ka jingshakri kaba janai.—”Testimonies for the Church,” Vol.2. sla 380,381.
KO KI KHUN SAMLA BAIEIT JONG U BLEI, PDIANG IA KI JINGHIKAI BAD JINGAI JINGMUT: 1 Petros 5:5. “Kumjuh, phi ki samla, to kohnguh ha kiba kham tymmen, Hynrei baroh to phin ïa kup ïa ka jingsngewrit ïa ka ban shakri paralok hi: naba U Blei u ïaleh pyrshah ïa kiba sngewkhraw, hynrei ha kiba sngewrit u ai ka jingaiei.” 2 Timothi 2:22. “Hynrei to phet iap noh na ki jingkwah brai ka jinglong samla: bad to beh brai ïa ka hok, ïa ka jingngeit, ïa ka jingieit, ïa ka jingsuk, lem bad kita kiba khot kyrpad ïa U Trai na ka dohnud bakhuid.” KA JINGSHONGKURIM KA DEI HAPDENG U SHYNRANG BAD KA KYNTHEI, YM DEI HAPDENG SHYNRANG PARA SHYRANG LANE KYNTHEI PARA KYNTHEI:Jenesis 2:18,22-24. “18 Bad U Trai uba U Blei u la ong ruh, Ym bit ba Uta u briew un sah marwei; ngan thaw ïa u ka nongsumar lem kaba biang…U Trai U Blei u la pynlong ka briew… 23 Bad U Adam u la ong, Kane mynta shisha ka long ka shyieng na ki shyieng jong nga, bad ka doh na ka doh jong nga:… 24 namarkata keiñ u briew un iehnoh ïa la u kpa bad ïa la ka kmie, bad un ïaineh ba la ka tnga.” Rom 1:27-26. “26 Namar kane keiñ U Blei u la iehnoh ïa ki ha ki jingsngewbrai ba khlemraiñ: namar wat ki kynthei jong ki, ki la ïa pynkylla ïa kata ka rukom bakynja tynrai jong ki hi sha kata kaba da kumwei na ka jinglong tynrai. 27 Kumjuh ruh de ki shynrang, da kaba ki iehnoh ïa kata ka rukom bakynja tynrai shaphang ka kynthei, ki la ïa ingkhong noh ha ka jingthrew jakhlia jong ki shaphang paralok hi: ki shynrang bad ki shynrang ki da iaiaileh noh ia kaba awria baijli, te ki da pdiang ha lade ïa kata ka bainong shitom kaba dei biang na ka bynta kata ka jingiaidwir jong ki.” Lebitikos 18:22. “Bad wat thiah ryngkat bad u shynrang, kumba thiah lem bad ka kynthei: ka long kaba jakhlia sang.” Lebitikos 20:13.
“Haba u briew u thiah bad u shynrang kumba thiah bad ka kynthei, ki la ïakam ïa kaba ijli baroh arngut: yn pyniap noh shisha ïa ki; ka snam jong ki kan long halor jong hi keiñ.” U Blei un bishar bad rai pynrem lada ki samla ki wad ïa ka jingsngewbha bad jingkmen pyrthei kiba ïalam bakla na ka ktien jong bad pynïakhlad ïa ka jingïadei bajan jong ki ban kohnguh bad leh ïa ka mon jong U. U BLEI KA JINGIEIT UM KHANG IA PHI BA PHIN IOH IA KA JINGKMEN HA KA JINGIM: Eklesiasis 11:9. “Leh kmen, ko samla, ha la ka jinglong samla; bad to ka dohnud jong me kan pynkmen ïa me ba ka sngi ka jinglong samla jong me, bad iaid ha ki lynti ka dohnud jong me, bad ha ka jingiohi ka khmat jong me: hynrei kynmaw me ba U Blei Un bishar ïa me shaphang kine kiei kiei baroh. 10 Namarkata pynkynriah noh ïa ka jingsngewsih na ka dohnud jong me, bad buh noh ïa kaba sniew na la ka doh: namar ka jinglong samla bad ka jinglong rangbah ki long kiba thala.” U Blei u kwah ba ka jingleh kmen ka dei ban don u pud, leh kmen ha U Trai, pynsngewbha bad pynkmen ïalade ha ka lynti jong U, ym ha ki lynti jong ka pyrthei ka ban sa pynmih ia ki jingsngewsih bad jingbabe hadien. Eklesiasis 12:1. “To kynmaw ruh ïa la U Nongthaw ha ki sngi ka jinglong samla jong me, katba ym pat wan kita ki sngi ba sniew, bad ba la jan kita ki snem, haba men ong, Ngam don ka jingsngewbha ha ki.” Don ruh sa kiwei pat ki bynta ïa kiba ka ïing jong ngi ka lah ban long ka jingkyrkhu. Ki jingleh sngewbha jong ngi kim dei ban long hapoh ka jingpynïaid jong ka rukom pyrthei, hynrei da U Mynsiem U Khrist bad ka jinghikai ka ktien jong U. (Ka Jingim Kaba Bha Tam. Sla, 16) Philipi 4:4. “To phin ïalehkmen noh ha U Trai ha la ka sngi.” (1 Kor 1:31; Salm 37:4). Haba phin sa sngewsih bad babe. U syiem Solomon u la babe ïa ka jingpynlehnohei ïa ki snem ha kaba wad ïa ka jingkmen bakynja pyrthei bad beh ïa ki jingpynsngewbha ïa ka dohnud ba kwah brai jong ka pop. SNGAP IA KA JINGHIKAI U KPA: Proberb 4:1-10. “1 To sngew, phi ki khun, ïa ka jinghikai u kpa, bad to shahshkor ban tip ïa ka jingshemphang: 2 Naba nga ai ba phi ïa ka jinghikai kaba bha; to wat iehnoh noh ïa ka aiñ jong nga. 3 Namar nga la long u khun ïa la u kpa, uba lung bad kumba marwei hi ha ka jingñiew ka kmie jong me.
4 Te u la hikai ïa nga, bad u la ong ha nga, To ka dohnud jong me kan bat ïa ki ktien jong nga; sumar ïa ki hukum jong nga, bad to im; 5 to pynïoh ïa ka jingstad, to pynïoh ïa ka jingshemphang; wat klet ïa ka, lymne wat phai noh na ki ktien ka shyntur jong nga. 6 Wat iehnoh noh ïa ka, te kan ri khop ïa me; to ieit ïa ka, te kan sumar ïa me. 7 Ka jingstad ka long kaba kongsan; to ioh te ïa ka jingstad: bad da kiei kiei baroh kiba me don to ioh ïa ka jingshemphang. 8 To kyntiew ïa ka, te ka ruh kan kyntiew ïa me: kan wallam ïa me sha ka burom, haba me piam ïa ka. 9 Kan ai ka jingdeng ka jingaiei ïa ka khlieh jong me: ïa ka pansngiat ka jingitynnad kan aiti ha me. 10 To sngew, ko khun, bad to pdiang ïa ki jingong jong nga; te ki snem ka jingim jong me kin long shibun.” U Jisu u la hikai ka jingduwai ïa ki synran. Namar kata phin duwai kumne: “Ko Kpa jong ngi uba ha bneng”. Sngap, shahshkor, pdiang, bad leh ïa ka jinghikai U Kpa jong ngi uba ha bneng, kaba la thoh ha ka Baibl Bakhuid.
Proberb 4:20-25. “20 Ko khun, to shahshkor ïa ki ktien jong nga; to pyndem ïa la ka shkor ha ki jingong jong nga. 21 Wat ai ba kin leit noh na ki khmat jong me; to sumar ïa ki hapdeng la ka dohnud. 22 Namar ki long ka jingim ïa kita kiba shem ïa ki, bad ka jingkhiah ïa ka doh jong ki baroh. 23 To ri khop ïa la ka dohnud da kaba sumar eh: naba na ka ki wan ki jingmih ka jingim. 24 To buh noh na me ïa ka shyntur bamutlop, bad ïa ki rmiang shyntur bamutlop to buh noh shajngai na me, 25 To ki khmat jong me kin khmih sha babeit, bad ki irmat jong me to kin khmih beit sha shuwa jong me.” TO NGIN LEH EI EI NA KA BYNTA BAN IARAP IA KI KHUN SAMLA “Ki ïing jong ngi ki dei ban long ka kut ïa ki samla kiba la shah pynshoi. Bun na ki ki ïeng ha kaba ïa phiah ka lynti. Kawei pa kawei ka bor ktah, kawei pa kawei ka jingshon jingmut, ka rai ia ka jingjied kaba pynwandur ïa ka lawei jong ki, ïa ka mynta bad ïa ka ban sa wan. Ka jingsniew ka khring ïa ki. Ki ïing jong ka ki phyrnai bad khring ïa ki. Ka khot sngewbha ïa iwei pa iwei i ba wan. Kylleng sawdong jong ngi don ki samla ki bym don ïing, bad bun ki wan na ki ïing bym don jingïarap, ne jingpynshlur; bad ki samla ki tuid noh sha ka jingsniew, ki hap sha ka jingjot wat hapoh ka syrngiew jong ki jingkhang ïing jong ngi.” (Ka Jingim kaba bha tam. Sla 17). “Kine ki samla ki donkam ïa ka kti ba kner da ka jingsngewlem. Ki ktien bha ktien sbun ba ngi kren, ki jingsngap bad jingshahshkor ïa ki, kin ñiad noh ïa ki lyoh ka jingpynshoi kiba lang ha ka mynsiem jong ki. Ka jingsngewlem ba kynja bneng ka don ka bor ban plie ïa ki jingkhang ka dohnud jong kiba donkam ïa ka jingiw-bih ka ktien U Khrist, bad ïa ka jingktah bajai-jai ka mynsiem ka jingieit U Khrist. Lada ngi pynpaw ïa ka jingsngewtynnad jong ngi ïa ki samla, khot sngewbha ïa ki sha ïing, bad ker tawiar ïa ki da ki bor ktah ka jingkmen bad jingïarap, don shibun na ki ki ban kmen eh ban phai pat sha ka lynti ban kiew sha khlieh.” (Ka Jingim kaba bha tam. Sla 17).
KA POR JINGIM JONG NGI HA PYRTHEI KABA LYNGKOT “Ka por jong ngi hangne ka long kaba lyngkot. Ngin ïaid lyngba ïa kane ka pyrthei tang shisien; kaba ngi nang iaid, to ngin im ka jingim ba dap biang. Lada ngin plie ïa ki dohnud bad ki ïing jong ngi sha ki jinghikai bakynja blei jong ka jingim, ngin long ki nur-um ha kiba tuid ka bor ka jingpynim. Na ki ïing jong ngi yn tuid ki wahduid ka jingpynkhiah, kiba wallam jingim, jingitynnad, bad jingseisoh ha ki jaka kiba tyrkhong bad bym seisoh…” Sla 17. Salm 37:3,4. “To shaniah ha U Trai, bad leh ïa kaba bha; to shong ha ka ri, bad to beh ïa ka jingshisha. 4 To pynsngewbha ïalade ruh ha U Trai; te un ai ha me(phi) ïa ka jingkwah ka dohnud jong me(phi).” Lada phi don jingkylli. Phone: 7005424191/9856052465. Nga duwai na ka bynta jong phi, To U Blei Un Kyrkhu Kyrhai ïa ka jingim jong phi ba man la ka sngi. Phi ki khun samla kynthei bad shynrang phi long kiba kordor ha khmat U Blei, to san to roi kyrhai, to im bha im miat, to long ki khlur kiban tyngshaiñ na ka bynta ka burom U Blei, bad ha ka ïing u kpa bad ka kmie, bad ruh ka burom ïa la ka ri bad jaidbynriew. Na ka bynta ka Kyrteng U Jisu Khrist, Amen bad Amen.
Da u Pastor K. Syiemlieh, (Mawlum Ramkdait)
