Ka jingshimti ïa ka jingkitkhlieh ha ka jingtrei jlih bad jingtrei dep ïa baroh ki kam ki jam bakhraw bad kiba rit bad ki jingtrei baroh ka jaid da ki Trai ri ki Trai Muluk lada ban jop ïa ki jingeh kiba khang lad. Ka jingïatai bad jingkren paidbah kaba la long kham mynshuwa ha u bnai Lber 31, 1998 ha kaba ki nonghikai University bad nonghikai skul bad ki student ki la ïa don ryngkat ka ai ka jingpynshai ba ka jingtrei kitkhlieh ïa la ki kam ki jam bad jingtrei jingktah baroh khamtam kito kiba da trei ni trei jlih bad trei pynitynnad ka thew lane ïalam sha kine ki thong kiba la buh kumne harum.
(i) Nyngkong Nyngshap ka mut ka jingshimti ïa baroh ki jaid jingtrei da ka jingsngew kitkhlieh ka jingthrang bad ka jingpynshong ryntih da ka jingbynrap lang ka bor jong ka khlieh ka met bad ki kti ban pynlong ki kam kiba biang ka rynieng ka ryniup bad ka dur ka dar bad kiba don ka jingitynnad ha ki.Ka mut ka jingseisoh jong ki jingtrei kiba ngi da trei ni bad leh ryntih kumta ka mut ba ka jinglong bad jingleh thurmur bad ka trei tang dep ïa la ki kam ki jam dei ban pynrit bad pynduna katta katta.
(ii) Ka jingtrei kitkhlieh kam ju don ka jingsngew khohñioh ka jingkhñium bad jingsngewrit eiei ban pynbiang bad pyndep ïa la ka bhah trei kam jong uwei pa kawei kiba la shimti ïa la ka jingtrei jong ki ban trei pyndep bad trei jlih.
(iii) Ka jingtrei kitkhlieh kam mut ka jingpynsyrwa kai ïa la ka baiseng khaïi ka ioh ka kot bad ka bor bad ka por.Ka jingthylli jong ka jingsngew kitkhlieh ka pynmih shibun ki kam bymman ki kam kai, ka sniew ka smeh bad ka pynsuhsat ïa ka imlang sahlang ka longshong bad ka longïing.
(iv) Ka jingtrei kitkhlieh ka ïarap shibun ban khyllie ïa ka tipbriew ka jingshemphang ka akor ka buit bad ka spah mynsiem ban pynkhie bad pynriewspah ïa ka longbriew manbriew kaba dap rynieng bad ki kam kitkhlieh.
(v) Ka trei kitkhlieh ka ïarap ban pyllait lada na ka jingthala da ka jingtrei aiti lut.
(vi) Ngi dang sah madei mynta kum ka jaitbynriew imat dang shu don ki briew kiba don ka jingsngew kitkhlieh.Lada ki hajar bad ki phew hajar ki pynrung ka jingkitkhlieh ïalade bad kiwei ngin jin da la kiew rasong hakhmat baroh ki jaitbynriew shisnieh pyrthei khamtam ha ka bor bad ka sap treikam
(vii) Kiwei kiwei ki wan knieh ïa ka jingtrei jongngi namar ngi kyntait ïalade ban trei naphang bad da ka jingtbit ba kham kyrpang ha ki jait kam bad jingtrei kam baroh.
(viii) Ka jingkyrduh kam ka dung shisha lymda ngi shimti ban trei ki kam naphang bad ka sei bor lada.
(ix) La katta ka lad ka plie lada ngi ioh ki kynhun nongtrei da ki briew lajong halor ka jingbun briew ha ki shlem bad korkhana ka khaïi pateng, ka rep ka spah jingri bad ter ter.Ka khlieh bad ka bor treikam naduh khlieh haduh khongdong ka dei ban long shisha kaba jlih bad ryntih.
(x) Ngim lah len ba ki jingtrei shitom ïa baroh ïa ki briew ka donkam eh lada ngi kwah ban roi ban kiew bad manbha ha kane ka khep shuwa haba ki jaitbynriew pyrthei ki rung sha ka spah snem 2000 A.D.
Ka paw shai ba ka jinglong thylli jong ka jingsngew kitkhlieh bad ka jingpynsyrwa ïa ki lad trei kam katkum ka jingdon jingem ha ka spah mariang ka la pynthut ïa ka bor kynshew jong ki paidbah ha ki shnong kyndong ba dang sahdien.Kumta lah ban pynkhlaiñ ïa ka bor kynshew katba lah na kaba sah tam man ka sngi kam pher wat lada kan kham shim por ba kan long ban khyllie ka seng khaïi ngi mut shuwa ka bai seng ha ki lyngkha ba bun bah ka khaïi pateng ne ka trei ka ktah.Wat hapdeng ka jingduk bad ka suhsat ngi hap tuklar ban pynkhlaiñ ïa ki bor kynshew pisa bad ka bor kyrshan lade na ka bynta ban pynmih ki lad bai seng.Namar ka jinghiar ka bor treikam ka ïalam bunsien sha ka jingduk, ka sahdien bad hiran pyrthei.
Katba kine ki jingkitklieh ki ban khia ïa ka jaitbynriew kaba thrang ban ieng ha la ki jong ki kjat kumno ban shimti ïa ki jingkitkhlieh kat kine hynrei haba don ka mon lade ka jingthrang ka jingangnud bad ka jingsngewbang ne jingshitrhem ban pdiang bad pyntrei kam ïa ki da ka bor balang bad da ka mon lade ki long pat kiba ai ka jingkmen (job satisfaction) bad ka jinglah (interest) ban leh ïa kaba donkam baroh ryngkat bad ki shnong ki thaw ki paidbah paidsan kiba ïa kit ïa bah.Bad ka thong kaba ha lyndet duh ka long beit ka jingkyntiew ïa ki longïing bad ki shnong ki thaw ka jingroi bad jingmanbha ïa ki briew bad ki paidbah baroh.
Namarkata ngi donkam ban wad ïa ki daw ka jingsuda jong ka jingangnud bad ka jingshitrhem ïa ka kam ha ka liang ki jingtrei jingktah baroh kiba ai ka jingim ïa ki paidbah baroh (kaba ha ka phareng ka ïalong ryngkat bad ka embodiment and fulfillment of work culture and social discipline).Kata ban wad ïa ki daw ka jingsahdien ha ki rukom treikam kiba bit dur bad biang rynieng bad weng shisyndon ïa ka jingsahdien ha ki rukom treikam bad pynlong ki jingtrei kam kiba tbit kata ki jingtbit bad ki sap treikam dei tang ïa uwei bad ar hynrei ka mut baroh phar u paidbah paidsan uba treikam ha la ka jong ka jingtrei shityllup ha kane ka jylla jongngi.
Ka trei dep bad shitrhem da u paidbah baroh ka pynlong ka imlang kaba iaid ryntih.Lada lah ban weng syndon ka jingsahdien ha ka trei ni trei ryntih trei pynitynnad. Ngim lah ban len ïa ka jingshisha jong ka jinglong briew jongngi ba ka dei ka hok tynrai jongngi ban ieit ïa la ka jingtrei da ka jingtrei ryntih bad pynitynnad ïa ka ba kan long kaba seisoh bad long ka jingkyrkhu ïa kiwei ki para mynsiem bad ka jingpyndep ïa ka mission kaba uwei pa kawei ngi dei ban pyndep ïa ka.
Da u Hamlet B.Ngapkynta
