Khadduh eh, ka sorkar MDA-2 hapoh ka jingïalam ka party NPP ka la hap ban pynden hi toin halor ka sur ki paidbah ban pynthymmai biang(review) ïa ka State Reservation Policy hapoh ka jingïalam(enitiatives) jong ka party VPP.Hynrei,ha kano ka rukom kan pynthymmai ne pynkylla ym pat lah satia ban batai haduh mynta.Ka sorkar MDA-2 bad ka VPP ki hap ban shaniah ha kata ka jingai jingmut jong ka Expert Committee.
Kane ka lah ban dei ka buit jongka sorkar tang ban pynlip ïa ka ding ba rhem jong ki paidbah halor ka Reservation Policy.Ka sorkar ka tip bha ba katba nang slem katta ki paidbah ki nang klet bad nang pjah halor ki mat ïakhih paidbah(public issues). Kam don satia ka por(time limit) ba ka VPP bad ki paidbah ba kin ai por ïa ka sorkar MDA-2 ba kata ka Expert Committee kan pyndep kloi ïa ka kam jongka, la kalong tang hapoh shi bnai ne ar bnai ne shi snem ar snem. Dei hangne ba ka sorkar ka ïohlad ban shim kabu(take advantage) ban pynslem ne pyntud ïa kane ka kam. Wat lada ai ne buh por ruh, ki dang lah ban pan por bunsien ban pyndep ïa la ka kamram(duty).
Ngi la ïohi tang hapoh kine ki san snem tam mynta ruh,bun bah ki mat ba ktah ïa u paidbah(public issues) ki la shu sah kut ldui mynta khlem poi sha bneng ne sha khyndew(hang in the balance). Ka mat pynkynriah ïa ka Them mator ha Them Mawlong kaba la dep rai bad mynjur da ka sorkar MDA-1 ban pynkynriah noh bak bak khlem pynslem shuh ha kito ki por hynrei mynta la palat san(5) snem ei ei, kane ka kam ka khlem poi shano shano ruh. Ka jingtokit(enquiry) ïa ka jingshah siat ïap u Ex. General Secretary ka HNLC, i (L) Chesterfield Thangkhiew ha Mawlai ruh kan shu jah la ka jah da ki buit sianti jong ka sorkar. Ha kiba don ka bor, ki leh bad pynkylla katba mon.Ka kam IPL, ka jingpynrung ïa ka ktien Khasi ha ka kyrnit kaba phra(8th Schedule) lei lei ki da pass da ka Assembly tang ban pynhun ïa ka jingïakhih u paidbah hynrei imat sa shi pateng ar pateng bynriew ruh kan ym pat seisoh satia. Shisien ba la pynslem, kata, la nang blad bad nang klet hakhmat u paidbah.
Kaba ima mynta kalong ba ïoh ba kane ka sorkar kan pynslem ne pyntud sa ïa kane ka mat paidbah (burning issue) jong ka Reservation Policy. Kan shimpor da ki bnai ba ka sorkar kan thung (constitute) ïa ki dkhot ne member jong kata ka Expert Committee. Ka Committee pat ka donkam ban shong meeting bunsien namar tang shisien shong meeting kam lah satia ban shim ïa ka rai bad ban phah ka jingtyrwa (proposal/recommendation) sha ka sorkar. Hangta ruh kan shimpor da ki bnai.
Ym tang katta, hynrei ynda kane ka Committee kan aiti bad phah sha ka sorkar ruh, ka sorkar kam lah satia ban shu pdiang beit (accept in to to) katba ai jingmut (sugestions) jong kane ka Committee. Ynda kata ka Report jong ka Expert Committee kan poi ha kti jong ka sorkar, hangta te, hai-re-hai artad ki buit laiphew jait lah ban ïohi ba kan leh ka sorkar (the Govt will play a tactic role) namar ba katei ka mat kaba don jingma (sensitive issue) hapdeng ki ar jait bynriew. Hap ïa pyrkhat bha ba ïoh kum kine ki rukom pynslem (long and delayed procedures) kan jia biang sa mynta ka sien ïa kane ka mat kaba ktah shisha ïa ki khun samla ba la nang la stad ki bym pat ïohkam ïohjam (unemployed educated youths) ha ka ri baieit jongngi.
Da u Babu Kular Khongjirem
