Kane ka Tamasa pynshong shit ne pynlam wir ïa ki paidbah ne ka Election kumba ong ka ktien nongwei ka la sdang biang mynta u bnai Rymphang 2023 bad kane ka jadu pynbiej ïa ka jingmut jingpyrkhat jong ki paidbah kan ïai bteng haduh kumba ar taïew tam ei ei naduh mynta ka taïew. Ha kane ka tamasa shongshit paidbah, bun ki paidbah naduh ki samla ki samhoi, shynrang bad kynthei, ki riew rangbah bad longkmie ruh kumjuh ha ki kyrdan bapher bapher kim khein ne kim salia shuh ïa ka sngi ka miet, kim salia shuh ïa ka duh thiah ka duh dem bad khlem tyngkai shuh ruh ïa ka por bad ka bor jongki ban pynlut kai bad pynleit jingmut beit triang tang shaphang uta u kandidiet bad ka party jongki ka dei ruh ka por ïa peit matdong briew,ka por ba ïa bishni pihuiñ para shnong para thaw, bad ka por wat ban ïa phoi bad ïa pait ïapra wat shi ïing shi sem ruh kumjuh.
Ngi ïohi ba, man ka por ba, katba dang jngai ka Tamasa shongshit paidbah (Election), bun ki briew ki ïakren tip briew tip Blei suda. Bun ruh ki la ïa pynpaw ba ki la ngiah bad kdang hi shoiñ ïa kane ka Tamsa hynrei mynta pat, mar ïa poi kane ka tamasa, kine hi kijuh ki briew kiba leh shongshit khleh biej eh hakhmat hakhmat ryngkat bad u kandidiet jongki.
Don bun bah ki daw balei tang shu poi kane ka Tamasa pynshongshit paidbah (election) ki briew ki ïa leit noh ïap kumba shoh jadu ka myntor. Dei ha kum kane ka por ba ka khawai ka dawai ka pahuh kyrhai na u kandidiet bad ka party jongu. Ka dei ruh ka aïom kaba u kandidiet u dang don ka mynsiem ieit, burom bad pynsngew jan ïa ki paibah. Ka dei ruh ka aïom ban ïoh leh ba heh, shong kali ei bad jied da kino kino ki kali rem dor katba mon. Ka dei ruh ka aïom ba ki kandidiet bad ka party jongki ki ïohlad bad shim kabu ban pynkiew skong ïa u paidbah nongkyrshan jongki khamtam ïa u duk u suk bad u luk u lak uba kham shitom ban ïoh leh ba heh ba hain kum kiba ïoh kabu kiba ïoh ba kot.
Hynrei, mar ïa dep thep vote pat,kynjah hi jar ka jingshongshit ki paibah. Ki kandidiet kin leit rieh noh sha ing paki dulan jongki. Ki paidbah bapli kin shem shitom ban wad bad ïakynduh ïa ki. Kiba rem lei ki jah syndon noh jar bad kiba jop pat kin ïa leh bad ïa rai katba mon ne sngewbit ma ki. Lada ki paidbah nongpynjop jongki ki isih bad shun ïa ka party BJP, ki MLA ba la pynjop jongki pat (elected representatives) kin leit ïa snoh khnang shata. Lada ki paidbah kim mon ne sngewtynnad ïa ka party NPP ba ki ong hana, long kumba leit ai doh lypa ïa u Garo ne ka AITC ba ki ong ka party Bengalee na Kolkata, ki MLA ba kin sa pynjop pat kin leit noh ïap sia sia shata kumba noh ïap u dkhiew ha ka thit. Peitkai keiñ, mar ïa jop, khlem artatien ki MLA bad ka party ba ki jop kim nym kheiñ briew shuh ne kim salia shuh ïa ki paidbah nongkyrshan lajong hynrei khlem artatien kin pyngngeit bad pynksan ïa ki paidbah nongkyrshan ba kin leit ïa snoh rdin kat sha ka party ba ïoh thaw sorkar. Ki paidbah bapli ki kylla long tang kum u brut. Ynda la dep pyndonkam ïa u, ki bret noh sha rud bad sha nala khlem salia shuh.
Mynta, ba dang ïoh pisa bher bher, man u briew u lok suda, hynrei ynda la kyduh pat, wat tang ha tyngkong iing ruh kim shlan ban wan mih. Ki paidbah ki dei ban da khan da pyrkhat bha, ki dei ban da puson janai bha ha kum kane ka por shongshit ïoh ki babe dier por kylla tang shu mar ïa dep ka tamasa pynshongshit paidbah (election).
Da i Babu Kular Khongjirem
