Ka jingtyllun jong ki shalyntem ka por ym lap ba ïohsngew ba ka jingwan jong u snem thymmai ka la jan bun na ki briew man la ki por ki ju ap khmih ïa u ba kin ïoh pyndonburom da ka jingïakmen lang baroh ba khnang ba un long u snem uba bha na ka bynta ka kam ka jam, ka kamai kajih ka bam ka dih ka kup ka sem bad kumta ter ter.
Nga lah ruh ban ong ba na baroh ki jinglehkmen dei tang ha ka jingwan u snem thymmai ba ka long ka jinglehkmen kaba heh tam kaba ha shityllup ka pyrthei ngi ju pyndonburom don kiba ap khmih lynti ba kin ïa kynduh ïa ki paralok kiba na jan bad na jngai bad kiwei kiwei de ki jingap khmih lynti kiba bha. Don ruh kiba ap khmih lynti ïa u snem thymmai ha ki jingmut jingpyrkhat kiba thala kum ha kaba kin ïoh ïaleh shongshit da shibun ki jingkwah ba sniew kum ka ïa dih buaid ka ïaleh sngewbha bad la ki lok bad kiwei kiwei de.
Lada don ka jingïathuh na kine ki kam thala kaba mih ka long ka pynkulmar shnong kane ym ba tang ki khynnah samla ki leh hynrei wat haduh ki rangbah ruh nga shem ba ki don bun kiba leh. Haba jia kum kine kiei kiei kiba hap mih ban tem dei ki longkmie. Haba dang ap khmih ïa u snem thymmai bun na ki longkmie kim ju ioh ban lehkmen laitluid ba la ka ïing hynrei ki hap long ‘Security’ pynban ha ki lad shnong jong ki shnong jong ki ban lait na ki nongthaw jingkulmar.
Ïa ki shynrang hi la ju tip kum ki ‘Khadar bor’ hynrei ha kum kine ki por pat da peit ïa kiba bun ki shynrang i kum ki ‘Robot’ ba shah ‘Control’ ha ki jingsngewbha ki bym don tang khyndiat ruh ka ‘Bor halor lade’. Lada u shynrang hi u pyndonkam hok ïa la ki bor nga ngeit skhem kaei kaei kaba sniew lane kaba sngewsih kan ym jia ha la shnong ne wat ha ka jingim jong u ne ka jong kiwei ruh.Bun na ngi ki briew haba wan u snem thymmai ngi ju ap khmih lynti tang ïa ka spah ka phew ba ngin bit ngin biang, ngi ap khmih lynti ruh ïa ka jingkoit jingkhiah hynrei bun ngim ju khmih lynti ba ngin im noh ka jingim ba thymmai na ki jinglong barim jongngi kum ka nuksa lada dei u nongdih ha ka jaka ba un khmih lynti ba un pynduna lane iehnoh, phewse da poi kato ka sngi i kumba un nym lah khie shuh pynban namar ba la shukor u thiat.
Ha ka jingshisha haba ngi pdiang ïa u snem thymmai ngi ruh ngi dei ban pynthymmai noh ïa la ki jingmut jingpyrkhat kumjuh ruh ïa ka rukom im jongngi. Lada ngi la im ka jingim kaba lyngkar ha ka mynnor hynrei shuwa ban jam sha u snem thymmai ngi dei ban long ki briew kiba pyrkhat thymmai khamtam ba ngin im noh ka jingim kaba thymmai ba khnang ngin long ka nuksa ïa kiwei khamtam ïa kiba hapoh jongngi ba kin long ki jingshai ïa kiwei pat ha ka lawei. Kum ban shu pynkynmaw ba ïa ka jylla jongngi la tip kum ka jylla ba bun hi ki dei ki Khristan hynrei balei pat ki bun tang ki kam bymman suda? Hato kam dei seh ba ngin kyndit bynriew noh na kiei kiei ki jinglong bad jingmlien basniew?
Bunsien haba nga dei iaid lynti lyngba ïa ka Ïewduh bad haba nga shong kali khamtam ha ki bus saw nga sngewsih bad teng teng nga i lehrain ban peit namar bun na ki rangbah kumjuh ruh ki samla tang ka sngi kam pat noh hynrei la ïa ïaid pawang bad lada ki ïa kiew ha bus lada kim ïoh jaka shong shuh ban ieng ruh kim lah shuh la ïa kohnguh samthiah. Don lei shisien namar bym lah kyrda shuh imat nga i kum ban liat sa ka patlun jrong. Nga ju pyrkhat tip ki khun jong ki, ki biang ne em ka bam ka dih haba dang shai ruh la ïa buaid. Teng teng ruh nga sngewlehraiñ ban sngap ïa ki ktien ba ki kren khamtam lei lei lada ïohi ki nongwei kin kynnoh kumno tip ïa ka jaidbynriew jongngi?
Tang kine ar tylli ba nga tip balei ki jia kine kiei kiei ka daw ka long ba kat bym pat poi ha ka saja ym ju kynmaw Blei bad sa kawei ka long ba kim don ka bor halor lade katba dang khlaiñ ka met ka phad bun ki ïa kwah ban pynsngewbha ïa la ka doh, i kumba kim donkam ïa u Nongthaw kumba kim donkam hi ruh ban don ka bor halor lade phewse ynda la kham noh ka met ïa ud ïa iam ha u Blei ba un map ïa ki palat ki ryngkang jong ki. Ngan da iohi ïa kum kito ki briew nga shait pyrkhat imat ba ki la kdang ka ïa sngewbha ne ba kim sngewkhlaiñ bor shuh ne balei tip? Tangba ainguh pat ïa u Blei ba ki dang tip ban kylla haba ki dang don hangne ha sla pyrthei.
Namarkata nga kyrpad ïa baroh kiba ïoh pule ïa kane ka jingthoh ba kin da buh la ki kular ha la ka jingim jingim ba shimet ba ha une u snem ban wan ngin sdang noh ban pynthymmai ïa la ka jong ka jong ka jingim ba khnang haba ngi lah ban leh kumne kan pynlait ïa ngi na kiba bun ki jingbabe shuwa ban dier ka por.
Te shuwa ban pynkut nga don eiei ban ong ïa baroh ki nongpule khamtam ïa ki samla, “TO KYNMAW RUH ÏA LA U NONGTHAW HA KI SNGI KA JINGLONG SAMLA JONG ME, KATBA YM PAT WAN KITA KI SNGI BA SNIEW BAD BA LA JAN KITA KI SNEM HABA MEN ONG NGAM DON KA JINGSNGEWBHA HA KI” To PUSON ïa kane.
Khublei Shibun
KA SNEM THYMMAI BASUK BAD BA KMEN ÏA PHI BAROH.
Da u Bah Embhahki Syiemlieh
