Ngi long ka pateng bynriew kaba donbok tam ban im haka spah snem kaba ai ha ngi ïa ka lad ban iohpdiang bad ban sakhi ïa ka roi ka par bad ïa ka jingkiew sted jong ka jingnang jingstad kaba la kot shaduh u pud kumba ong mano re ba mynta ngi la kit lut haka pla patlun ïa ki jingdonkam baroh bad ban ioh ktah ïa ka pyrthei baroh kawei tang ha ka shi khyllip mat. Tangba, kaba pynpyrkhat ka long ba nalor ba ngi kheiñ ïalade kum ka pateng ba donbok pat de, ngin long ruh ka pateng bynriew kaba hap ban shim ïa ka jingkit khlieh sha lade ban ai ïa ka jubab ka ban ïa hap tara bad ka jingkwah jong ka pateng bynriew ban sa mih pateng ïa ngi. Balei ba ong kumta, ka dei namar kaei ba Ngi Mad- Ngi Wad- Ngi Tba mynta ka don jingïasoh ruh bad ka jubab ba ngin hap ai jingkheiñ ha kata ka ban sa wan. Kane ka jingthoh kam mut ban ktah mationg ïa ka jingleh jingkam jongno jongno hynrei tang ban ïathir ïatai halor katei ka mat ba la kdew haneng ha kaba ïa dei bad ka jing ïatyngkhuh kam hapdeng ka mariang bad u briew.
Ki lum ki wah, ki dieng ki siej, ki syntiew ki skud, ki jingthaw ba im ha ryngkew bad ha um, ki jingthaw bym don mynsiem ba don ha ryngkew, shapoh ramew bad sha sahit bneng. Ha ka shikyntien ka pythei bad ki jingdon jong ka, ki dei ki jingthaw jingpynlong ba kordor ba la buh la thaw dur da u Trai nongbuh nongthaw ha la ki jinglong bad jingdondor jongki. Haba shu peit ïa kine ki jingthaw jingpynlong jong u nongbuh nongthaw hangne ha snieh pyrthei, sngewdei shisha ban kynud lang bad ki jingthoh haka kitab Genesis jong ka Bible kaba ong “Ha khmieh ka la bha eh”. Pat de ka jingkylli ka long; haduh katno kane ka jingthoh, “Ha khmieh ka la bha eh” ka dang long tikna ba ngin iai kynud sah ïa ka ha kane ka juk beh rongphong bad thaw kynsha jongngi? Ka juk haka ba ïa ka jinglong sotti jong ki jingthaw ba kordor U Blei sawdong ka mei mariang la sloit noh haka bor jongka jingbrai tang ban pynsngewbha ïa la ka jingkwah.
Ka pyrthei te ka ïa tai ha kine ki sngi tang shaphang ka jing jubor ka jingjot noh jong ki jingdon jingem jong ka mariang. Ki riewstad ruh ki duh thiah duh dem ban wad bniah shaphang ki daw jong ka jingjot jongka mariang bad kumno ban tyngkai pat ïa ka ba dang sah jong ka. Ki ri khrawbor ka pyrthei pat ki ïalum lang manla ka teng ban wad ïa ki lad ki lynti kumno ban pynneh pynsah ïa ka jinglong tynrai jong ki jingthaw jingpynlong. Ki sorkar, ki kynhun niam, ki dorbar shnong dorbar hima, ki seng trei mon sngewbha ha shityllup ka pyrthei ki ïa khih ïa ksaid kumno ban kot sha ka thong ban pynlong biang ïa ka mariang kaba lah ban im. Hynrei ka jngkylli kaba heh bha ka long, aiu pat ma nga bad ma phi ki nongshong shnong jong kane ka pyrthei ngi la leh na ka bynta ka daw bah jong ka jingshah leh beijot ka mei mariang ha kine ki sngi? Hato ngi la ju pyrshang ne em ban sngap thuh ïa ka sur jingud jong ki para jingthaw jingpyllong kiba im lang sah lang bad ngi ha pneh ka mei mariang? Kan jin da la bha shibun lada ngin shong bad khaprip ïa la ki khmat bad pylleit ïa la ki jingmut shipor ban puson, “Ioh ba nga long ma nga ne ioh ba ngi long ma ngi ki daw ne ki nongpynjot ïa ka mariang lyngba ki jingleh jingkam jongngi”.
Kam don jingmyntoi ban ïa kyan ïa pyrta manla ka khep ban pynneh pynsah mariang hynrei ha lyndet pat uta uba kren da ka shyntur u kyrngah ruh da ka tdong. Ngi ju pyrta borabor ba ngi ieit mariang bad mano hi bym ieit ïa I mei lajong hynrei ngi sngewthuh ne em ïa ka kordit ba ka kmie mariang jongngi ka hap kit na ka daw ka jingkangkar ki khun jong ka? Ka jingeh hangne ka long ba ki ktien bad ki kam kim ju ïa trei ryngkat. Ki bor sorkar, ki bor shnong, bor balang, bor seng ki ïa pynlong ki jingrakhe pynneh mariang man ka snem lyngba ki program bapher bapher ha la ki jong ki jong ki jingkit jingmut jongki pynban haduh katno ngi da thew jingmut shisha ban pynmih soh pynmih symbai ïa kaei ba ngi la ïa durut namar bunsien hi i kumba ka jing pyllong ïa kine ki program ka shu kut noh tang kum ki tamasa pyn pyngngad jabieng.
Kawei pa ka wei ka sien jam ba ngi shim na ka bynta ka daw bah ka mariang to kan nym kut noh tang kum ha kaba thung dieng mynlyiur, shah thang pat tang shu poi ka synrai bad tlang lane sar iew mynta ka sngi, bret jaboh biang kum lashai mynstep lane ïa iaid rally mynsngi naduh nangne haduh hangtai, pynkut pat da ki jingïadih sha sngewbha bad kaba bud nangta ka long ngi ïa phai biang shala ki jong ki jinglong bym phikir bad kheiñ snep ïa kiwei pat ki jait jingpynlong tang namar ba ngi shim ba ngi don ïa ka bor ban pyndem ngon ïa ki.
Ngi ïa pom dieng pom siej ngi ïa thang khlaw thang btap, hato ba donkam shisha ne ba ki kti ki trei tang ban pynjot? Ka ba shyrkhei ka long ba haka kyrteng ka rep ka riang bad ka kamai kajih ngi pynkylla sohpdung ïa ki khlaw ki btap bad ki dieng ki siej bad pynduh jait syndon ïa kiwei pat ki jingthaw ba im. Kaba sngewthamula ka long ba ïa ud ïa nam pat tang shu rang tyrkhong ka bneng lane tang shu wan lynshop ki bor mariang.
Naka bynta kito kiba kham smat ban ïa kiwei pat ha ki kam shang makia sha ki lum ki wah bad ki khlaw ki btap to da khan janai bha hato ka dei ba phim don jyntah shisha ban shet ha ïing ban da hap leit ber syndon wat da ka bih ïa ki dohkha dohpnat haki um ki wah? Hato ka dei shisha ba phim lah shuh ban taw ja khlem ka doh skei doh sier? Hato ka dei kaba bakla ba don ba ong ba phim jah sliang shuh lymda phi ioh dih ïa ka snam jong ki ñiangbri lane phim imat shuh lymda phi ioh bam ïa u khyllai jongki ‘yiar khlaw? Phi don daw aiu sha bad kine ki mrad khlaw ba phim hun shuh ba kin im suk imsain kumba im maphi? Hateng hateng la ju shem ba kita kiba hap ban ïalam ïa u paidlang ban nym pyniap ïa ki jingthaw baim hynrei dei kine pynban kiba ïalam na khmat ban leit beh sha ki khlaw bad ki um ki wah ban pyniap ïa ki mrad khlaw bad ki dohum.
Na ka bynta ki nongtih maw tih dieng to da pyrkhat bha ïa kane kawei bad kata ka long lada phi tih na ka bynta ban myntoi balei pat phim nang ban tyngkai ruh namar borabor hi ïa kata kaba myntoi ngi ju tyngkai ruh ban iai ioh pyndonkam. Balei ban tih maw iong maw lieh wat haki jaka ba don ki tyllong umbam umdih. Toi ïalade lada phim donkam um shuh hynrei balei ban da pynjot noh ïa kine ki tyllong kiba bsa bad ai jingmyntoi ïa uba bun ba lang uba duk ba suk u bym kot bor ban thied um kumba lah ma phi? Kan jin da la bha shibun lada phin pdiang ïa ka ne ka jingshisha bad kata ka long ba dei na ka jinglong hanga mei jongphi hi ba poi shaduh u pud ban shah khang tih maw tih dieng syndon hangne ha ri jongngi.
Na ka bynta kito kiba kam ïalade ba ki dei kiba lah nang lah stad, balei tang ka phyllaw lajong kaba donkam ban pynkhuid; hato ki lynti shnong, ki surok shnong, ki nala bad ki phud wah kim dei ki lynti iaid jongphi ne phi im beit tang haki saw kynroh ka iing jongphi khlem da ring mynsiem lang ïa ka juh ka lyer bad shong rieh tngen hapoh ka juh ka sahit bneng? Ha ka bieit ha ka ak stad. Tangba phi stad ïa kaei kein haba phim nang wat tang ban it hangno ba dei ban bret ñiut.
Katno tylli shuh ki skul, ki college bad ki skul bah ngi ïa don bad katno ngut shuh ki nonghikai bad nongpule ngi ïa don hynrei balei pat ka sawdong sawkun ka shlei da ki ñiut ki nier, ki plastic bad ki jaboh jabaiñ wat hapoh phyllaw bad harud jong kine ki shlem ai jinghikai? Imat ki jaka pule ki lah pheil ban hikai ïa ka ba dei ne imat ki nongpule kim lah kynmaw shuh ïa kaei ba dei ban leh kum ki nongshongshnong ba don jingkit khlieh jong ka ri bad ka jait bynriew. Namar kaei kaba kham iohi shynna ka long kat ka jingbun ki nongpule ha sor shillong hynrei katta ruh nang jur ka jaboh. Ban jin lada baroh ki nongpule ki shim jingkitkhlieh ban lehkhuid leh suba ïa ka sawdong sawkun, ka sor shillong ryngkat ka jingitynnad jong ka, kan jin da la ioh ïa ka nam kum ka sor ba khuid tam ha pyrthei.
Namar ba ka jingeh kaba kham shyrkhei ka long ba ngim ju sngewthuh ne nang wat tang ban pyrkhat ruh la ki kam bad jingleh jongngi kiba ngi da pyllut sngi pyllut ïa, ki ai jingmyntoi ne em ne ki long tang ki jingleh sngewbha ban pynhun ïalade bad ïa kiwei pat kiba dawa jingsngewbha nangi. Kane ka jingthoh ka pyrta shaphi ki nongpule ban bishar bniah biang sa shisien ïalade kaei ba phi la noh synniang naka bynta ban tyngkai ïa ka jingitynnad bad jingkordor ka mariang. Ka pynkynmaw ruh ba manga bad maphi ngi long ki nongbishar bastad tam ban bishar kano kaba kham dei ban jied. Ia ka ba ai jingmyntoi to da tyngkai ruh hynrei lada ka dei tang ka kam sngewbha, bha ban sangeh noh ka ba beh brai. Kyntang ïa wai hei ko lok ïa kyndit bynriew noh shwa ba phin shah nguid ha u thlen ka jingshukor da lade ïalade.
Da i Jamshaphrang Pohtam
