SHILLONG:
U President ka Khasi Student’s Union (KSU) u samla Lambokstar Marngar u la ong ba lada dei da kano kano ka seng kaba shim ïa kane ka mat ban dawa ban pynbeit thymmai noh ïa kane ka Reservation Policy lane ka bhah thungkam thungjam kaba dei ruh ka mat kaba ktah ïa ka jaitbynriew, na ka liang ka seng kan ai ka kti ka mon ka diang ban kyrshan ïa kane.
Haba kren u samla Lambokstar u la ong ba naduh kaba sdang hi la sngewthuh shai hi na ka liang ka seng ba ka sorkar hi kadei ban pyrkhat bad puson khamtam ban khmih bniah biang sa shisien ïa kane ka bhah thungkam thungjam hapoh kane ka jylla Meghalaya mynta la 50 tylli ki snem. U la ong ba naduh u snem 1972 wat tang shisien ruh ka sorkar kam pat lah ban khmih bad pynbeit ïa kane ka Reservation Policy.
“Nga sngewthuh ba kane kadei ka ïa kaba biang tam ba ka sorkar kadei ban peit bniah ïa kane ka mat. Kane ka Reservation Policy kamdei shuh ka mat ban dawa jong no re jong no, hynrei kumba long mynta hi kadei ka jingdawa jong uba bun ba lang kumjuh jong ka Bri Hynniewtrep hi baroh kawei. Kumba 5 sngi la ïaid ka jingshah thngan jong u nongïalam ka Voice of The People’s Party (VPP) u Bah Ardent Basaiawmoit hynrei ngi ïohi pynban ïa ka jingkuman jong ka sorkar jylla bad ka sngap jar jar”.
U samla Lambokstar u la ong ba ka kyrwoh kaba ka seng ka kwah ban phah sha ka sorkar jylla, “Namar ngi sngewthuh shai ba mynta ka hapoh ka sorkar ym dei tang ki National Party kiba don, ki don lang ki party riewlum, ki paradoh parasnam jong ngi kiba long ki nongmihkhmat. Ko sorkar lada phi don ka jingkitkhlieh na ka bynta ki pateng kiban sa wan, khot noh sha ka miej jingïakren sha une u rangbah bad ka kynhun jong ki. Kumba ka long, ngi ïoh ha ka kynhun jong u Bah Ardent ngi ïohi ïa ki khraw pyrkhat, kiba la nang la stad, khot ïa ki sha ka miej jingiakren ban ïathir ïatai, khamtam kumno ban ïa pynbeit ïa kane ka Reservation Policy”. U la bynrap da kaba ong ruh ba kumba la khmih lynti da u paidbah ka jylla ba dei ban khmih bniah biang ïa kane ka mat khang ba kan long ka jingmyntoi jong u ba bun ba lang khamtam ki khun samla jong ka jylla hi baroh kawei.
U samla Lambokstar u la ong ba na ka liang ka seng KSU ka ai ka kti kamon ka kti kadiang ban kyrshan ïa une u nongïalam bad shaniah tylli ha kane ka kynhun jong ki ba kin pyntyllun ïa kane ka kam, khnang ba kane ka jingïakhih kan nym long kaba kulmar jingmut.
U samla Lambokstar u la ong ba ka jingkhot ka sorkar ban ïakren ha ka Committee kadei tang ban ïathir halor ka Roster System ym na ka bynta ka Reservation Policy. “Kaei kaba ngi kwah mynta ka long ba ka sorkar kadei ban ïakren ïathir halor ka Reservation Policy ruh bad ba la 5 sngi la ïaid ka sorkar kam dei shuh ban kuman bad wat ailad ba ka ding kan klang bad wat ailad ba ka jingbitar ki samla kan long da kumwei pat.
Shuh shuh u la ong ba na ka liang ka seng ka dang ïaishah bad dang ïai ap hynrei tang kawei ka jingkyntu ka seng sha ka sorkar ba dei ban khot sha ka miej jingïakren ïa kine ki rangbah halor kumno ban pynbeit ïa kane ka Reservation Policy.
U la ong ba kane ka jingïakhih kamdei shuh ka sien kaba nyngkong hynrei naduh ki nongïalam barim jong ka seng bad na ka liang ka pynpaw ka jingsngewnguh ïa u Bah Ardent uba la shim ïa kane ka sienjam bad kane kamdei ka mat jong no re jong no hynrei kadei ka mat jong ki khun samal ka Bri u Hynniewtrep.
Kane ka jingïakren jong u samla Lambokstar ka long hadien ka jingwan jngoh jong ka seng KSU ia u Bah Ardent Basaiawmoit u ba la shah thngan mynta la 6 sngi kynthih ha Additional Parking Lot ban dawa na ka sorkar ba dei ban pynbeit lane pynthymmai ia ka Reservation Policy lane ka bhah thungkam thungjam.
