NONGPOH:
Ha kine ki sngi, ba la don ka jinghap slap ha ka jylla bad khamtam ha Ri Bhoi, ka la wanrah ïa ki jingjia aksiden ba harukom ha ki bynta ka surokbah NH-6 ha Ri Bhoi, ha kaba la ong ba ha ki kynta hap slap, ki don kumba 5 haduh 6 tylli ki jingjia aksiden, ki jingkylla kali bad hap nala ki kali, kiba ïaid lyngba ka surokbah NH-6.
Katkum ka jingïathuh u Bah Gilbert Lyngdoh Marshillong, u la ong ba kiba kham ngat ha kitei ki jingjia aksiden, ki dei kito ki kali nabar khamtam eh kiba na ka jylla Assam, namar ka jingpynher stet palat ki nongñiah ïa ki kali bad ki kali kiba la ngat ha ka apot aksiden, kylla bad hap sha nala.
Na kaba la ïathuh da utei u heh Pulit, la ong haba kheiñ kyllum lang na baroh kitei ki jingjia aksiden, ki la shu don tang kiba mynsaw, ha kaba don napdeng kiba la mynsaw jur bad don kiba mynsaw tang malu mala, hynrei ym shym la don pat kiba la khlad.
Na ka liang utei u heh Pulit ha Ri Bhoi, u la kyntu ïa ki nongñiah kali, ba ki dei ban long kiba husiar haba ki ñiah kali bad khamtam eh ha ka por ba hap slap, namar ki jingjia aksiden ki kham jia ha ka por ba hap slap.
Ha kawei pat ka jingjia kylla kali, kaba la jia ha ka miet jong ka 20 tarik Lber ha surokbah NH-6 ha Ri Bhoi, kawei ka bos Night Surper kaba don ïa u number AR-20-9099, kaba mih na Guwahati ban leit sha Kamrimganj, hynrei haba ka la poi ha kawei ka jaka kaba kham long khongdon hapoh ka shnong Shangbangla, katei ka bos ka la kylla sha kawei ka liang jong ka surok bad kaba la wanrah ïa ka jingmynsaw ïa kiba bun.
La ong ba ki la don kumba 60 ngut eiei kiba shong hapoh katei ka Bos, hynrei na kitei ki 60 ngut ym shym la don kiba la khlad, hynrei tang kiba mynsaw, ïa kaba la pynkit noh mar mar sha ki jaka sumar.
Ka daw kaba la pynlong ïa katei ka jingjia aksiden, la ong ba ka dei na ka daw jong ka jingpynher stet palat da u nongniah ïa katei ka bor, ha kaba ynda u la poi ha katei ka jaka kaba kham long khongdong, um lah shuh ban tehlakam ïa u lakam bad kaba la pynlong syndon ïa katei ka bos ba kan kylla.
