SHILLONG:
Ki katto katte ngut ki samla pule ka St Anthony’s College ha ryngkat ka jingsynran lang ka NEHU Student Union (NEHUSU), myn ha ka 13 tarik Rymphang 2024, ki la leit ban ai da ka shithi ha u Pricipal kane ka jaka pule u Rev Br Dr Albert Dkhar ban pyrshah halor ka jingbthah ïa ki samla pule kane ka College ban phong da ki Uniform haba wan sha class.
Ki samla pule kane ka College khamtam ki khynnah ka Fourth Samester, ki la pynpaw ïa ka jingpyrshah halor kane ka rai jong ki nongïalam College ka long halor ka nongrim ba kane kan pynlehnohei ïa ka pisa namar kane kan long ka snem ka ba khatduh ba kin pule ha kane ka College.
Kumban shu pynkynmaw, na ka liang ki nongpynïaid ka St. Anthony’s College, Shillong ha ka 29 tarik Naiwieng 2023, ka la pynmih da ka jingbthah ïa ki samla Pule, ba mynta u snem ki samla pule ha kane ka College ki dei ban ban phong noh da ki Uniform.
Haba kren sha ki lad pathai khubor, na ka liang u samla Arman Malngiang ula ong ba ka jingdawa ki samla pule kane ka College ka long ban dawa na u Principal ban shah ïa ki samla pule Fourth Semester ban wan class khlem da phong uniform.
“Ngi la pynsngew ba kam ïahap ïa ki samla pule kiba la jan dep ïa ki jingpule jong ki satang mynta u snem bad kan long ka jingpynleh noh ei ïa ka pisa namar ka dor ka uniform ka long T. 5,800, kumta ngi la dawa na u Principal ban yn ym pynshitom ïa ki samla pule Fourth Semester namar ka Class kan sdang haka taïew ban wan,” u la ong.
U la bynrap ruh ba ha kane ka jingïakynduh na ka liang u Principal u la ïathuh sha ki, ba halor kane ka jingdawa na ka liang jong u, un sa rah ban pynsngew sha ki bor ba halor ban pynbeit ïa kane ka jingeh.”
U samla Arman u la pyntip ba na ka liang ki samla pule ki la dawa ruh na u Principal ba halor ka rai ban phah phong uniform, na ka liang ka College ka dei ban thoh shai ha ki Prospectus bad ki Form, ba ka long ka ba donkam ban phong Uniform hapoh ka College.
