MAWKYRWAT:
U Robertjune Kharjahrin u kyrtong monlang jong ka Regional Democractic Alliance (RDA) jong ka party UDP bad ka HSPDP u ban sa ïa aireng ha kane ka Election MP na Shillong Parliamentary Seat u la sdang ban leit ïalap election napoh ka South West Khasi Hills kaba dei ka Constituency ba u shong u sah na ka bynta ban pynsngew thuh ïa ka thong kum u samla rangbah ban ïawer ïa ki paidbah ban ai ka jingkyrshan ba pura ïa u ba un jop don burom ha kane ka election MP ka ban sa long shen ha kine ki bnai ban sa wan. Ïa kane la sakhi da ka jingpynlong ïa ka jingïalang paidbah mynta ka 13 tarik Rymphang, ha ki lai tylli ki jaka kata ha Ïew Mawkhan Pyndenumsaw, Ïew Rangblang, bad ha Umjaraiñ South West Khasi Hills District.
U Robertjune Kharjahrin haba kren ha kane ka sngi u la ong, “ka kam ban jied nongmihkhat hapoh ka Parliament sha Delhi kam dei ka kam kai ka dei ka kam ïap kam im ban ïa said na ka bynta ka jaidbynriew ha ka shynshar khadar khamtam ïa ngi ki paid riewlum hapoh ka jylla Meghalaya. Ka India ka dei kawei ka Ri kaba khraw ha ka pyrthei kaba khlaiñ bad kaba lah ban knieh noh ïa ka jingbun briew na ka Ri China ha kine ki snem ban wan, namar kata nga dei u briew u ba donbok tam ba nga ïoh lad ban mih khmat na ka party Riewlum kaba heh duh happoh ka jylla Meghalaya ha ryngkat da ka jingïatrei lang ka party UDP bad ka HSPDP wat la shibun ki briew kiba la nang la stad ki riew rangbah na kine ki ar tylli ki seng saiñ pyrthei bad napdeng ki kyrtong ki ban sa ïa aireng ha kane ka Elekshon MP na kiwei pat ki party nga dei u ba dang samla tam na pdeng kita. Bun ki paidbah ki buh jingkylli ïa nga balei phi ïaleh ïa ka MP election ba phim sdang shwa da election MDC ne MLA, ka jubab kaba shai ïa ki paidbah ba nga kwah ban ïaleh election MP ka long ba shibun ki sohkyrdot, ki mat jingdawa jong ka jaidbynriew kum ka ILP, u pud u sam, ban pynkhlaiñ shuh shuh ïa ka Syrnat kaba 6 (Six Scheduled), bad shibun kiei kiei ba ki na ka liang ki sengbhalang, ki MDC bad MLA ki la rah ïa kane, hynrei haduh mynta ki dang sahkut hapoh Delhi ha Parliament dei na kata ka daw ba nga kwah ban pynurlong ban ïa kine kiei kiei baroh”, ong u Bah Robertjune Kharjahrin.
Shuh shuh u la ong, “ngam shem la long kum kiwei kiba biang ka spah ka phew hynrei nga wan na ka longïing kaba duna ha ka ïoh ka kot bad shwa ba ngan mih ha ki rynsan politik nga la shah phrang ïa lade ban long kum u nongïalam na ka seng bhalang, kumta kam long shuh kaba thymmai, nga la tip lut ïa ki jingeh ki mat ki jura jong ka jaitbynriew, ha baroh ki liang namar kata ka la dei ïa nga ba kane ka jingshakri ïa ka jaitbynriew bad ïa ka Ri Khasi kan ym kut tang hangta da kaba kwah ban long kum u nongïasaid sha ka dorbor bah jong ka Ri India kata happoh ka Parliament sha Delhi.”
“Ha kane ka election MP ngim dei shuh ban sngew marthain, sngewniam ne sngew party ka la dei ka por ba ka Bri u Hynñiewtrep Hynñiewskum kin jied bad phah tang ïa u wei u MP uba pyntikna ba u ta u MP un dei u ba trei u ba mihkhmat na ka bynta ka Ri bad ka jaidbynriew uba kynsai bad uba janai tam, ngi la ïoh mad ha kine ki 15 snem ba la dep kaei ba kine ki MP ki la leh ngam kwah ban batai ne bishar ki paidbah ki la ïohi ïa kaei ba ki la leh. Ha ka riti shynshar jong ka Ri India ka long kaba laitluid ha kano kano ka jingeit uwei pa uwei u briew khlem da don kano kano ka kyndon ban khang ban mane ha kino kino ki kynhun niam, hynrei ha kine ki sngi ba mynta ki la don ki riew shitniam kiba sdang ban leh donbor ïa ki paid khristan kata ngi ïohi kaei kaba la jia hangne hapoh ka Ri India jong ngi’” La bynrap u Bah Robertjune Kharjahrin.
Ka jinkwah jong u ka long ruh ban wanrah ïa ka shynshar khadar kaba khuid bad pynduh ïa ka bamsap bampong da kaba unkwah ba baroh ki paidbah bad ki nongshongshnong ha baroh ki District jong ka Jylla ngin ïa tip lang ïa baroh ki skhim MP ba ki paidbah ki dei ban ïoh, u la pynshai ruh ba ïoh don ki briew kiba ong ba ka UDP, HSPDP kiba don haka sorkar synrop MDA bad ka NPP, BJP kin sngewthuh bad shah ïalam bakla ha kaba ïadei bad ka jingmane Blei laitluid, da kaba u buh jingkylli, Naduh mynno ka party UDP bad HSPDP ka la khang pyshah ban leit mane Blei ne pynshit niam? ka UDP bad ka HSPDP ki dei ki party kiba ïada ïa ka jinglong trai ïa ka khyndew ka shyiap, ha ka riti shynshar khadar, bad ka ai ïa ka bor ban mane laitluid ha kino kino ki jingngeit shimet shimet. Namar kata ngi donkam ban ïa tylli ka ka jingïalong kawei ha baroh ki liang.
Ha kane ka sngi la ïa synran lang da ki riew rangbah jong ka RDA kata na ka party UDP bad HSPDP ha ryngkat ki paidbah kiba la wan sngap ïa kane ka jingkren jong u Robertjune Kharjahrin ha ryngkat kiwei de ki riew rangbah ban pynshai ïa ka thong bad ïa ki mat ki jura jong ka jaidbynriew.
