MAWKYRWAT:
Myn ha ka 12 tarik u Rymphang, 2024 ki nongtrei ka party congress ki la mih noh bad ka long kaei kaei ka jingduhnong kaba khraw ïa ka Congress Party ha South West Khasi Hills District bad ka Mawkyrwat Block Congress Committee.
U President ka District Congress Committee, u Bah K.K Nongsiej, haba ïathuh halor kane u la ong ba u la ïehnoh ïa ka jinglong kum u nongkitkam jong ka Congress party na ki daw shimet jong u.
Ha kajuh ka por ym tang kata, u Babu Valentine Thyrniang kum u President jong ka Mawkyrwat Block Congress Committee naduh katei ka tarik bad la sngewthuh ba hadien ka jingïehnoh kam na ka Block, u Babu Valentine Thyrniang u la pynshai paitbah ba un nym treh shuh ban long nongïalam ha kane ka party Congress.
Nalor kitei ki ar ngut ki nongïalam rangbah jong ka party, la ïoh ruh ban sakhi ïa ka jingiehnoh kam ka Dr. B. Marweiñ na ka kam kum ka President jong ka Mahila (Women’s Wing) hapoh ka Mawkyrwat Block kumjuh ruh ïa ka jingiehnoh kam u Bah Valdo Lyngdoh kum u District Youth President.
Shuh shuh katkum ka jingïoh lum jingtip ba ha ka juh ka sngi nalor kitei ki nongïalam, la ong ruh ba bun ki nongtrei jong ka Congress Party kiba don hapoh ka South West Khasi Hills District bad ka Mawkyrwat Bock ki la pynlong ïa ka jingïehnoh kam paidbah (Mass Resignation) halor ki daw shimet shimet jong ki.
